Cod. 8958 - 158v-159v

Auß Prag von 16. Aprill
   1] Vorgöstern ist ain currier von der Für(stlichen) D(urchlauch)t ertzhertzog Carln etc. zue der Kay(serlichen) Ma(jestä)t etc. von Gräz allhie ankhommen, der pringt bese zeitung, als namlichen, das der türgg uff der khrawatischen granitzen zway castell mit gewalt eingenommen, also daz er an jezo den freyen paß uf Carlstatt zue haben khan, also sy sich daz hievor erlitnen schadens wider ergötzt.
   2] Der chur- und fürssten abgesante wegen deß inn der Neustatt gefangnen fürssten tractations handlung halben sein noch allhie, läst sich ir wirckhliche verrichtung noch schlecht genueg ansehen, und obwolen sich anfangs under thaillen ein widerwillen und streitt wegen der session zugetragen, so spert es sich doch an jezo und auf dißmalls nit, allein will es sich an dem erwinden, das sie die abgesandte an statt aber von iren herren selbs geförtigten revers von inen geben sollen, weliches sich etliche waigern, wie dan sonderlich Mainz, Bäyren und Wirtzburg nit geren darein consentieren wellen. Den verfolg und entliche verrichtung gibt die zeit.
   3] Die sag doch inn stille will verlautten, das gewiß der neue churf(ürst) von Cöln diese tag aber nur mit 6 personen allhie gewest sein solle unnd bey der Kay(serlichen) Ma(jestä)t etc. audienz gehabt, nochmals alsbaldt wider darvon und wegg geritten, man wils aber an denen ortten, ehe mans wißen solle, nit offenbarn, derowegen man ihres anbringen vil weniger wissen khan.
   4] Ertzhertzog Ferdinandt etc. ist woll entschlossen, auf 8. Mayo auf hieher von Ynsprugg wegen der guldin vlyß aufzubrechen, so wollte aber ertzhertzog Carl etc. zue Laxenburg inn Mayo geren das warm pad daselbst besuechen, wie sy sich also noch werden entschliessen, zuvermueten, es werde noch vor pfingsten nichts daraus werden.