Cod. 8958 - 69r-69v

Uber nebenligendts wirdt von Prag in brieffen von 12. diß wie hernach vermeldet
   1] Den Christoff Sworowsky hat der könig von Poln in die acht erklert alß fur ein verreitter deß vatterlandts ganz ernstlich, ob es darbei bleiben, wirdt man hernach erfaren, ist in Wien gewest, aber vor wenig tagen von dar hinwegg, wohin er sich begeben, waist man nit, der khönig soll auf den tag zue Warschau außrueffen unnd gebietten lassen, das in derselben versamblung deß tages zu Warschau khainer khein wöhr zuckh bei verlierung der rechten handt, und da einer mit der wöhr schlag, soll er daz leben verwurckht haben, seind dardurch biß inn die 300, so mit der wöhr geschlagen, gefenckhlich ergriffen und einzogen worden, von denen hat man 72 enthaubt, den rest der gefangenen soll man gen Crekhau fieren, alda sich der pollnisch landtag endten wirt unnd zuachten, die andern auch mit dem leben zalen muessen.
   2] Der landtag zu Wien ist auch beschlossen, haben wol ettlich darnach at partem bei ertzhörtzogen Ernsten der religion halben gedacht, ist doch verbliben wie hievor anders mahls beschehen.