Cod. 8960 - 185r

Aus Prag von 26. Mayo
   1] Auf 20. dis ist herr secretari Erstenberger (als gesanter von der Kay[serlichen] Ma[jestä]t etc.) von hinnen zue den gaistlichen churfürsten am Rhein abgerhaiset, warumben es aber entlich zuethuen, ist in publico noch nit bewüst.
   2] So sollen der Kay(serlichen) Ma(jestä)t etc. verordnete unnd jungst benante ampaßatores (als namlich der bischoff von Olmitz, hörtzog von Minsterberg [so ainer vom hause zue Lignitz] unnd herr Kochtitzky) von hinnen nach Warschau zu Polln verruckhen, derselben khoniglichen wahl beyzuewohnen, denen solle der (bey Irer Kay[serlichen] Ma[jestä]t etc. hofe ordinari residierender) spannische ampaßator volgen, mit seiner presentia (wegen der Rhö[mischen] Ma[jestä]t von Spannia) die Fürst(liche) Durch(lauch)t ertzhertzog Ernsten etc. zue erlangung der pollnischen cron zue favorisieren, umb welliche cron dann die Fürst(liche) Durch(lauch)t ertzhertzog Maximilian durch dero in Polln habende aigne agenten auch starckh practiciert, und wirdet vermueth, marggraf Georig Fridrich von Anspach werde höchst gedachtem Maximiliano zue der pollnischen cron starckhen beistandt thuen alls grosmaistern des teütschen ordens und wegenc Irer F(ürst)l(ichen) Gn(aden) zue Anspach nachbarn gegen Preußen, wie dan hochgedachts fürsten von Anspachs gesanter (ain landtgraff von Lechtenberg) die vergangne tag nach Pollen alberaith allhie paßiert ist, wegen seines gnädigen fürschten (alls administrator in Preüßen) wie ain statthalter bey vil gedachter pollnischen wahl zuerschainen.