Cod. 8960 - 222r-222v

Auss Prag von 16. Juny
   1] Das ich euch ein zeit hero nit geschriben ist die ursach, das ich nit anheimbs, sondern im kayser Carlsbad gewest und nachmalß auf der post ein raiß nach Wien thon müssen, zu meiner widerumb hieherkhunfft aber hab ich sovil vernemmen, der herr graf von Fürstenberg und herr Kurtz, gehaimer rath, haben die verwilligung aines reichstags von den churf(ürsten) Sachsen und Brandenburg vor disem gebracht, deßwegen die Kay(serliche) M(ajestä)t zu den churf(ürsten) ins reich hinaus den secretarium Erstenberger gesandt, wann der widerumb zurugg khombt, werden wir derzeitt und stell gewißheit vernemmen.
   2] Alß ich vor wenig tagen (wie obsteht) zu Wien gewest, hab ich bey den hungern sovil inn erfahrung gebracht, das es an dem steh, das sie der Kay(serlichen) M(ajestä)t verwilligen wöllen, auf dißmal den hungerischen landtag durch die F(ü)r(stliche) D(urchlauch)t ertzh(erzog) Ernsten verrichten zu laßen und was diß orts gehandlet, guet zu haißen, als wann Ir Kay(serliche) M(ajestä)t selbs personlich zugegen weren, all dieweil Ir Kay(serliche) M(ajestä)t ir so erhebliche ursachen fürzuwenden haben, daz sie aigner person nit erscheinen khönden.
   3] Heut dato kombt ein sag aus, der pollnisch wahltag seye auf 4 inn 6 wochen verschoben mit hofnung, es solle auf unserer seitten abgehn und wirdet ausgeben, die F(ü)r(stlichen) D(urchlauch)t(en) ertzh(erzöge) Ferdinandus und Maximilianus haben sich mit Irer F(ü)r(stlichen) D(urchlauch)t ertzh(erzog) Ernsten dahin verglichen, das dieselb (irenthalben) die praminentiam zue der pollnischen wahl haben solle und sie baide mit irer sollicitation zurugg halten wöllen.
   4] Sonst wirdet alhie ausgeben, der könig von Denmarckht seye widerumb zurugg gezogen und komme nit heraus gehn Dreßden.
   5] Anstatt deß neulich abgestorbnen N. Herbrots gewesnen quattiermaister, hat der herr Gregori Bedell daselb ampt bekhommen, welcher hier zuvor der Kay(serlichen) M(ajestä)t hoffurier gewesen.