Cod. 8960 - 370r-370v

Aus Prag von 8. September
   1] Aus Polln von Warschau seindt gestern der spannische ampaßator wie auch ertzh(erzog) Ferdinandi gesanten alhie widerumb ankhommen, die haben iber jungst angezaigtes weitter nichts gebracht, pleibt also dieselb election in irem bestandt, wie man auch bey hoff allhie anderst nit waist, solle Ir F(ü)r(stliche) Durch(lauch)t ertzh(erzog) Maximilianus sich gegen dem 15ten diß zue Wien erheben und nach Olmitz rhaisen, daselbsten sich vil kriegs und ander volckh aus Österreich, Marheren und Schleßy versamlen, Ir Durch(lauch)t nach Polln zue convoieren, darbey sich vil stattliche landherren also auch von der reütterschafft und adelthumb befinden, werden auch die F(ü)r(stliche) Durch(lauch)t ertzh(erzog) Ferdinandt den Martio unnd Lalio Coloredi mit etlichem volckh zue roß und fueß zue sollicher comitiva verordnen.
   2] Höchst gedachte F(ü)r(stliche) Durch(lauch)t Maximilianus sollen sonsten 1000 schüzen in roth beclaidet zue dero leibs guardia mitnemmen und also khain zeit (sovil möglichen) zueversaumen haben, baldt inn Polln zukhommen, wie dan solliches die notturfft (als ich verstee) erfordern wirdet, dem schweden in der poßeß vorzukhommen, dieweil dieselb faction auch mitfieren mechte und man vor disem sagen wellen, so baldt der schwedt erwählet gewest, habe der groß canzler nach Cracau geeillet, daßelb schloß und die alda ligende pollnische cron für gedachten schweden in bewahrung zuenemmen. Der liebe Gott welle unrhue verhüetten und hochst gedachten Maximilianum in fridliche poßeß khommen laßen.
   3] Sonst solle mit demjhenigen (so der künigin in Polln die zeittung erstlich zuegebracht hat, das der printz von Schweden künig erwöhlet seie) daz roß gleich in der gemelten künighof zue boden für thodt nider gefallen, und als man daz Te Deum Laudamus in der kürchen (wegen gedachter erwöhlung) gesungen, die orgell gebrochen sein, welliches man für böse augura halten thuet.