Cod. 8960 - 384r-386r

Aus Wien vom 14. Septembris anno 87
   1] Haben sich die F(ürstliche) D(urchlauch)t ertzhertzog Maximilian zu Össterreich von dar auf die pollnische raiß begeben, zu Wolckhersdorff neben beiden herren zwayen gebruedern ertzhertzog Ernsten unnd Mathiasen etc., alß die Ir D(urchlauch)t daselbst hin belaittet, das mittagmahl, nachmaln das nachtleger zu Mistelbach 3 meil davon, deß andern tags alß den 15ten vier meil wegs von dannen das fruemahl zu Durrenholtz (alda der herr von Teiffenbach ettlich stund klain und groß geschütz abgehn lassen) gehallten, volgendts zue nacht biß gen Osterlitz unnd hernacher vollendt biß geen Wischa auf 2 meil verraist (da Ir D[urchlauch]t der herr bischoff von Olmitz nahent mit 100 rossen entgegen zogen), unnd alda denselben abent volgenden 17. biß auf mittag deß 18. verbliben, von dannen 2 meil biß nach Prostenitz (alda der landtschafft in Mährern bestellte 500 heiduckhen wol putzter vom statthor biß ans schloß in guetter ordnung gestanden und ire rohr loßprent) und den 19. mit den mörerischen blaitsleuthen biß in 350 starckh darbei, ausser Irer D(urchlauc)ht hoffgesindt, dessen gar wenig, und deß herrn Gallen khain össterreichischer gewest, nach Olmitz auch mit blaittung der hierigen burgerschafft, so ein viertel meil von der statt auf Ir D(urchlauch)t gewarttet unnd nahent in 2000 starckh gewest, zwischen 4 und 5 uhr gegen abent khomen, drey aus den pollnischen gesandten mit namen Sebastianus Brozoroski, decanus gnesneus, Franciscus Maslowski, notarius terrae wielunensis unnd Janussius Woromeczki de Zbaratz alhie gefunden, den 20. ist der bischoff von Khiob, Jacobus Zbaraski in Woronczin unnd Andreas Lesctynski de Lohzno mit 7 gutschen ankhommen.
   2] Den 22. seind die 1200 schutzen oder rott röckhl allhie durch die statt unnd umbs rath hauß fur Irer D(urchlauch)t losament furuber in guetter ordnung durchzogen, den 24. diß ist Joannes Zbororoski, castellanus Gnesneu unnd Alexander, dux Brunensis dapifer magni ducatus Lithuaniae mit 15 gutschen herkhommen, sonst sein zimblich vil pollackhen alhie, begeren alle gelt, ain jeder will der pest sein, Ir D(urchlauch)t haben ein theils schon khennen lernen, wie die sachen in Poln steet, erscheint auß disen zeittungen, man ist gewiser hoffnung, wan Ir D(urchlauch)t nur auf die pollnische gränitz khombt, es solle von tag zu tag besser werden unnd alle sachen zu einem guetten endt khommen, die schlösiger, wie man nachrichtung hat, sollen uber 1000 pferdt (ohne die bestellten, so zu Dornawitz beschaids erwartten) schickhen. Den 25. umb 8 uhr vormittag haben die pollnischen legaten zum ersten mahl audientz in einem grossen saal, da Ir D(urchlauch)t an einem tisch gestanden, nach mittag aber privat audients gehabt, alda der bischoff von Khiob im namen der pollnischen unnd littauischen stendt ein lange oration latine gethon mit erinderung, Ir D(urchlauch)t alß erwöhlter khönig wolten sie mit irer raiß lenger nit saumen, sich auch der widerwerttigen practicen und deß schweden halber nichts irren oder verhindern lassen, weren nicht so mechtig, der Allmechtig wirdt alles zurugg treiben, und darauf Ir F(ürstliche) D(urchlauch)t obberuerter stendt credentz schreiben uberantwort, welches herr Khobentzl offentlich verlesen, nachmals sich Ir D(urchlauch)t selbst auch lattine gegen den ständen der wahl unnd der pottschafften irer hieher khonfft halber höchlich bedanckht, unnd deß regiments halben nechst göttlicher hilff aller muglichkhait nach erbotten, auf das ander, so der bischoff von Khiob hievor furgebracht, hat der bischoff von Olmitz mit einer herrlichen oration geantwort unnd nachmaln beschlossen worden, das Ir D(urchlauch)t den 27. das juramentum publico in ecclesia praestirn unnd ime darauf das decretum electionis zuegestellt werden solle.
   3] Den 25. sein zeittungen khommen, das der cardinal Battari nach Krackhau khommen unnd durch deß cantzlers practickh unnd seinen anhang ein landtag auf den ersten October under inen angestelt sei, dem Battori zum khönig haben erwöhlet, haben auch ettwas in truckh und pollnischer sprach vor ettlichen tagen wider die, so auf unserer seitten sein, außgeen lassen, darinn sie Irer D(urchlauch)t wahl halber wider sie protestieren, entgegen sein die unserigen mit gleicher protestation im werckh, ist also allenthalben noch große verwirrung, man säumbt hiermit auch die widerwerttigen bestes fleis und glimpfs mit schreiben zuersuechen.
   4] Den 27. ist Irer Khön(iglichen) May(estä)t von den pollnischen legaten das decretum electionis mit vorher gehaltener meß solemniter in einem weissen atlaß uberantwort unnd durch 4 cammerer vor Ir May(estä)t bis in ir losament offentlich getragen, und die gesandten nachmahl bei der Khön(iglichen) May(estä)t taffel behalten worden, hat sich bis uff 2 nach mittag verzogen, zu abent spat sein schreiben auß Polen khomen, die sollen continuiern, was hievor und vor wenig tagen vom cantzler und cardinal Battory mundtlich furgeben worden, man lest sich aber nicht irren, sy haben ein starckhen widerstandt von den andern polen und gantz Littauen, so auf unserer seitten, bevorab ist sich dessen zutrösten, das der Battory vor nie in die wahl khomen, ohne scharmitzl wirdt es schwerlich abgehn, Ir Khön(igliche) May(estä)t seind morgen (wils Gott) aigentlich auf nach Troppau und volgends auf Crackhau zue. Der Allmechtig stehe uns bei und helff dem fromen herrn in gewünschter possehs, der allgemeinen christenhait zu wolfart und bestem.