Cod. 8960 - 393r-393v

Aus Prag von 19. September
   1] In vill mit disem currier anderst nichts, allain daz, obwollen die F(ürstliche) Durch(lauch)t ertzh(erzog) Maximilian am verschinen montag 14ten dis von Wien auf Olmitz verruckht, forther nach Cracau zue rhaisen, die pollnische cron alda zuempfachen, so will es doch nicht allso nach irem wunsch ergehen, der groß cantzler in Polln sich noch etwas unnütz machen und zuebesorgen, wir werden uns noch umb dieselb cron schmeißen mießen.
   2] Die F(ürstliche) Durch(lauch)t ertzh(erzog) Maximilian hatt gleichwol bey baiden churf(ürste)n Sachsen und Brandenburg umb ainen reitters dienst, auch gelts anleichen angesuecht, hatt doch der churfürscht von Sachsen den reütters dienst glat abgeschlagen und daz anlehen in bedenckhen gezogen, daraus wol abzuenemmen, Brandenburg werde noch minder thuen unndt scheint, daz man die pollnische election nit geren sehe, mit nit khlainer befrembdung an unseren hof in ansehung, daz for diser zeit Sachsen und Brandenburg vom haus Österreich vil guets empfangen haben.
   3] Neben dem daz wir nhun mehr warhaffte zeitung von Canischa haben, daz man von der nechsten niderlag 1500 lebendige türggen und 1300 köpff, sonnst 3350 roßen in die bevöstung gebracht worden, so hat man hernacher ain post vonn den neuhaisslern gehabt, welliche auch bey demselben handell gewest, das der Dobo baan im windisch lanndt auch in die 60 gefangne türggen hinab gebracht, wieviel aber sonst gepliben, ist noch unbewust, soll aber hernach auch angezaigt werden.
   4] Sovil man allhie wißens hat, seindt höchst gedachte F(ürstliche) Durch(lauch)t zue Wien verruckht mit 51 wägen und 1500 schützen, alle in roth und weis gekhlaidet, sambt 100 schützenpferden, und warte zue Olmutz ain großes volckh auf Ir Durch(lauch)t hinkhunfft aus Behaimb, Märhern und Schlessy, wie man sagt bis inn 30.000 starckh.