Cod. 8960 - 463r-464r

Auß Praag von 27. October
   1] Göstern frue ist ain kay(serlicher) currier von dem konigiliche läger aber mit zimlicher gefahr (so zwischen Beüten unnd denselben ist) alher khommen, der berichtet sovil, das Ire Ko(nigliche) M(ajestä)t etc. ain klaine halbe meill von Cracau in einem schlesel (Rockhowitz genanndt) mit irem läger ligen, bey derselben sein noch die pollaggen sambt auch Christoff Sbarowosky, sollen in allem bey 15.000 starckh sein.
   2] Der cannzler ist in der statt Cracau bey 6000 starckh, der will sich wehren so lanng er khan, hat umb dieselben gegen allenthalben höf, scheüren, müllen unnd nachent der statt Cracau ain kirchen abbrennen lassen, damit Ire Kö(niglichen) M(ajestä)t etc. nun die proviant unnd anfenthallt abgekurzt werde.
   3] Denn 16. diß haben sie ein scharmizell mitainander gethon, darbey Ire Kö(nigliche) M(ajestä)t etc. selbst unnd vornen daran gewest unnd bey 50 pollagkhen umbgebracht, die anndern aber sein alle wider in die flucht in die statt gewichen, unnd sind der unserigen nit mehr alß 3 geschädigt worden.
   4] Olkitsch 6 meill von Cracau, ain stättlin zwischen dem läger und Beüten, haben Irer M(ajestä)t etc. im hineinziechen gehuldiget, unnd obwol dieselb erstlich vorhabens gewest, das schlessel (so nachent dem stättlin) abzuereissen, damit daselbsten kein aufenthalt beschechen müge, so haben doch Ire M(ajestä)t etc. umb allerley erheblichen ursachen verbleiben lasen, unnd also fort geruckht in ein stättlin 3 meill von Olkitsch, stost ain pollnische pottschafft vom cannzler bey 30 gutschi zue Ir M(ajestä)t etc., die hat annderst nichts alß münklich sovil angebracht, des cannzlers unnd sein selbst rath sey, Ir M(ajestä)t etc. zugen wider zuerueckh, da sie sich annderst selbst vor schaden hüetten wellen, den aber auf dis inen Ir M(ajestä)t etc. zuem beschaidt unnd allain sovil angezaigt worden, sie sollen in ir losament ziechen, die werden durch starckhe waacht tag unnd nacht verwaacht unnd warten also noch ihres beschaids.
   5] Bey unnd umb gedachtes stättlin Olkitsch soll es sehr unsicher, unnd etlich vil hundert tarttaren, so unns zuewider sein, haben wir, dann der currier nit ohne sonndere gefahr alher kommen unnd sich verklaiden müessen.
   6] Den 12ten dis sollen daselbst 550 schlesische pferdt von gemelten tarttaren unnd dem stättlin angriffen sein worden, das sie die flucht geben und 36 wägen mit munition, als pullver unnd ire rüstungen sambt geschütz dahinden lassen müessen, darunder 7 umbkommen, ain graf Schickh solle sie gefiert haben, der auch unnder den 7 gebliben, der rest ligt noch zue Beüten, wartten des weywoden aus Posen, so mit ain 3000 mann zue Ir M(ajestä)t etc. stoßen solle, der inen wider zue hilf kommen mechte, derselbe auch 20 stuckh grob geschüz mitbringen.
   7] Sonnst haben sie alle fuerleüt bey den wägen unnd in der zall bey 50 personnen gewest umbgebracht, außgezogen unnd nackhent auf dem veldt ligen lasen.
   8] Herr Fellican Hermenstain ist aus Cracau vom cannzler wider zue Ire M(ajestä)t etc. inns läger mit der condition gelasen worden, der hat in der kirchen schwören müesen, das er sein bey der M(ajestä)t etc. habende pottschafft ledig machen, aber er sich selbst wider hinein stellen wölle, es ist aber biß datto weder ains noch das annder ervolgt.
   9] Die burgerschafft hat aus zwang dem cannzler schweren müesen, das sie ime biß auf den letsten mann hallten unnd ine deffendieren wöllen, aber in gehaimb fürgebende, wann es nun so weit komme, das Ire M(ajestä)t etc. den ernstlichen angriff thätten, wissen sie sich schon zue hallten.
   10] Den 18ten diß haben Ire M(ajestä)t etc. angefanngen die schanntz machen zue lassen, wie sie dann dieselb gelegenhait selbst besichtiget, unnd arbeith tag unnd nacht daran.
   11] Den 19ten diß sein die geschütz in die schanntz gefüert worden unnd also vorhabens gewest, den 20ten diß den ersten angrif zue thuen unnd die statt zue beschiessen, wellen also von dem ervolg bald mehrer particularitet haben. Der Allerhöchste verleiche der M(ajestä)t etc. glükh unnd haill, auch sighafte zeit. Amen.