Cod. 8960 - 500r-501r

Aus Prag von 10. November
   1] Aus Polln dem khönigischen läger von Cracau ist an heut dato meines herrn diener ainer curier weiß khommen, der sagt nit vil, allain was ich mit mühe auß ime gebracht, dan er ist aller khranckh und schwach alher gelangt, daz er sich gleich nach absteigung deß rosses alsbald hat miessen sich zu bett legen.
Ir M(ajestä)t khönig Maximilian hatten noch khain ernstlichen angriff gethan, haben das volckh voriger gestalt noch alles beyeinander, warten täglich mehrers von ettlichen orthen, alß dann wöllen sie mit ernst daran.
Der canzler erzaigt sich noch fest widerwertig, yedoch wolte aber er mit glimpf sich gern mit Irer M(ajestä)t einlassen, und er canzler waist nit, was mittel er brauchen möchte.
   2] Der paß ist von den tarttern noch zimlich herrauß verlegt, also das der canzler selbst den herrn Florian  von Hermenstain, welchen Ir Kho(nigliche) M(ajestä)t herrauß geschickht (weil er mit gedachtem canzler wol bekannt und daran ist) mit bey hundert personen zue roß und fueß beglaitten hat miessen lassen, mit dem ist auch meines herrn diener, der gemelt curier khommen, weil dan die littauer in starckhem anzug seind unß zum besten ist hoffnung zuhaben, der canzler werde sich verkhriechen. Gott schickhe alles zum bösten.
   3] Vor gestern ist Ir D(urchlauch)t ertzhertzog Ernst auf den hungerischen landtag nach Prespurg verruckht, waz sie gueths außrichten, werden wir herrnacher vernemmen, weil die hungern Ir Kay(serliche) M(ajestä)t etc. gern selbs bey inen gehabt hetten.
   4] Der bischoff von Straspurg solle sich bey höchstgedachter Irer F(ürstlichen) D(urchlauch)t zue Wien befunden und erstlich sich unbekhantlich verkhlaidt haben, was aber sein thun gewest, khan man nit wissen, und als man segt, solle er hieher zu Ir Khay(serlichen) M(ajestä)t etc. auch khommen, villeicht sich wegen dessen durch die navarrischen erlittnen schadens sich zuebeclagen.
   5] Post scripta
Der von Schweden hatt eine edelman hieher  zu der Röm(isch) Kay(serlichen) M(ajestä)t etc. geschickht mit ainem dermassen fraindlichem schreiben, das man darauß hoffnung schöpfft, mit ime schweden der pollnischen spalttung halben ein guetliches mittell zuetreffen.
Sonst haben wir alhie bey hof vom schweden khain andere zeittung als das leuth vorhanden, die ime von Danzig auf verruckhen Marienburg haben sehen.
   6] Der statthaltter von Brin (der hauptstatt in Märhern) ist auß ertzhertzogs Maximiliani läger alher khommen, der zaigt an, wie das der weywoda von Posen und ain littauischer grosser herr mit zimlicher anzal khriegsvolckh bey Irer D(urchlauch)t ankhommen sein, auch Irer D(urchlauch)t sachen in bösserrn terminis sich befinden, weder man ain zeit hero besorgt gehabt.
   7] Der groß canzler soll den altten rath zue Cracau abgethon und einen neuen gesezt, auch 7 burger (die er aines haimlichen verstands mit ertzhertzog Maximiliano im verdacht gehabt) aufhenckhen habe lassen, darab Ir Khö(niglichen) M(ajestä)t (als man sye dessen verstendiget) die trenen inn die augen geschossen, das dise redliche leth von Irer M(ajestä)t wegen ir leben so jämmerlich ainbiessen haben miessen.
   8] Auf 26. passato haben Ir M(ajestä)t die statt Cracau wöllen beschiessen lassen, man hört aber noch nit, das es ervolgt seie.