Cod. 8961 - 12r-12v

Auß Praag von 6. Jenner anno 88  
   1] Den 24. December anno 87 haben (auß bevelch Irer Kö[niglichen] M[ajestä]t etc. in Pollen) herr Pregartwari unnd herr Anndereas Peter sambt dem herren Spattes Starosta das schlos Lorelauen (so die haubtmannschafft der 13 stätten, welliche den pollaggen vor dieser zeit seindt versezt gewest) in Zips mit 3000 mann (ohne ainiches geschrey oder sturm) eingenommen unnd erobert, unnd also die pollaggen, so darinen gewesen, den 25. dis morgens frue abziechen lassen, unnd alßbaldt die unnserigen in die vöstung kommen, haben sie vil freidenschüs gethon unnd haben die unnseren darvor kainen ainigen mann unnd allain ein ros verlohren, unangesehen, die pollaggen sich ein weill dapfer gewöhrt unnd starckh heraus geschosen haben.
   2] Ir Kö(nigliche) M(ajestä)t etc. Maximilianus seindt noch zue Sernpitz an den pollnischen granitzen, dahin kombt taglich vill volckhs unnd erwarten Ier Kö(nigliche) M(ajestä)t etc. täglich der littauischen abgesanndten, unnd lassen höchstgedachte Kö(nigliche) M(ajestä)t etc. irem alten kriegsvolckh abdannckhen, bis die monnat Januarius unnd Februarius füruber kommen, innzwischen mehr volckhs werben, umb alsdann mit allem ernnst fortzueruckhen.
   3] Herr Christoff Sborofsky ist noch alhie unnd tödtlich krannckh, das man seiner schier besorgt, er werde daraufgehn unnd also sein rais nach Itallia (umb hilf für Ire Kho[nigliche] M[ajestä]t etc. zuewerben) zueruggbleiben.
   4] Der schwed ist beim canntzler inn Cracau, konden sich der cronung halbe noch nit vergleichen.
   5] Der lanndtag in Hungeren ist fast am endt, die hungerische stännd haben nit mehr als auf ein jar verwilliget, alles tahin angesechen, das sie Ire Kay(serliche) M(ajestä)t etc. geren selbst haben wellen, unnd sollen Ir F(ürstliche) D(urchlauch)t erzherzog Ernst innerhalb 6 tagen von Preslau aus Hungeren widerumb zue Wienn sein.