Cod. 8961 - 184r-184v

Auß Prag vonn 26. Aprill
   1] Die resolution aus Spannia vonn denselben khönig (der polnischen sachen halben) soll allhie bey hof allberaith ankhommen sein, eröffnung aber derselben wirdet noch zuer zeit hinderhalten, die mag man doch villeicht baldt vernemmen.
   2] Die Fürst(liche) Durch(lauch)t Maximilianus (wie man vernimmbt) soll aus Polln sich schrifftlich erclärt haben, man solle seiner gefänglichen erlädigung halben nichts eingehn noch bewilligen, daz dem haus Österreich an dero reputation unnd autoritet verclainerlich sein wurde, sondern Ir Durch(lauch)t wellen lieber ain gefangner khönig ersterben, alls sich der cron Polln begeben unnd deßelben titull renucieren.
   3] Obwollen die Kay(serliche) Ma(jestä)t gern gesechen, die ertzh(erzöge) vonn Österreich solten allhie zuesamen  khommen, Maximiliani halben sich mit Irer Ma(jestä)t zue berathschlagen, beharret doch die Fürst(liche) Durch(lauch)t ertzh(erzog) Ferdinandus, daz derselben beschwärlich fallen welle hieher zuekhommen, da aber die Kay(serliche) Ma(jestä)t etc. sich nach Lintz begeben khönten unnd alda zuesamenkhunfft anstellen, wolten Ir Durch(lauch)t sich auch dahin begeben, ist aber Irer Kay(serlichen) Ma(jestä)t etc. bedenckhlich, dieser zeit vonn Prag zueverruckhen.
   4] Mann gibt für, der khönig vonn Schweden sye thödtlich kranckh oder villeicht schon gestorben, deswegen der jetzige pollnisch khönig nit lanng bey derselben cron zuepleiben haben mechte, unnd also Maximiliani wegen noch etwas hoffnung, daz auf sollichen fahll die polln villeicht sich zuem haus Österreich mehr genaigt erzaigen wurden alls vor disem nit geschechen.
   5] Der schwed solle ain edellmann zue baiden churf(ürsten) Sachsen unnd Brandenburg heraus geschickht haben und umb pasport anlangen laßen für etliche gesanten, die er zue dem churf(ürsten) am Rhein abzueförtigen vorhabens gewest, ob man (neben höchst gedachten baiden churf[ürsten]) auf mitell handlen mechte, wie die polnische sachen zue fridlicher vergleichung unnd erlädigung ertzh(erzogs) Maximiliani khönten gericht werden, seye doch gedachter edellman der ursachen etwas unwillig abgeschieden, weil höchst gedachte baide herren churf(ürsten) seinem herren, dem vonn Schweden, den khöniglichen titull nit gegeben, wie er verhofft gehabt.
   6] Der moscovitter hat sich durch ain gar freüntliches schreiben gegen der Kay(serlichen) Ma(jestä)t etc. aller möglichen hülff anerbotten, unnd jab  da Ir Kay(serliche) Ma(jestä)t wurde bedacht sein, ain pottschaft zue ime hinein zueschickhen, seye er genaigt, ain bintnus mit Irer Ma(jestä)t wider den türggen und die polln zuemachen. Die antwurt waißt man noch nit.