Cod. 8961 - 287r-287v

Auß Praag von 14. Juny
   1] Deß pollnischen wesens halber steht es noch in bewußten terminis, wie mann aber sagt, sollen auf halb July nechst khonfftig der herzog von Arschiot und Vepasiano Gonzaga hieher khommen, und auf soliche zeitt von der Kay(serlichen) M(ajestä)t etc. die ertzherzogen von Österreich auch hieher beschriben sein worden, darzu solle sich auch der vom bapst nach Polln abgeordnete legat cartinal Aldobrandino befinden, umb sich zu berathen und zu teliberiern wegen erledigung deß Maximiliani auch sonsten der pollnischen sachen halben, ettliche sagen, er werde bey solicher versamlung ettlicher chur und fürsten gesandten sich auch befinden.
   2] Andere sagen, die Kay(serliche) M(ajestä)t etc. begere gar nit, das der gedacht bäbstische legat hieher khomme, sondern seinen weg auf Wien nemmen solle, aldorten werde er bey der F(ürstlichen) D(urchlauch)t etc. ertzherzog Ernnsten allen beschaid finden.
   3] Sonst seindt der bewusten chur und fürsten gesandten noch alhie bey hoff, sovil man noch vernimbt keiner andern ursach halber als umb confirmation wegen der jüngst zue Namburg renovierte erbeinigung.
   4] Mann will schier von einem reichstag sagen, der im Augusto nach Regenspurg ausgeschriben werden sollt, der wurde doch vor dem Jenner anno 89 seinen anfang nit erraichen.
   5] Die von Wesprim inn Ungern sollen ein türggisch gränitzhauß, Chikwar genant, mit list einbekhommen, deßelbig geblindert und nacher verbrandt haben, eben auf ein zeitt das mehrer theils derselben türggischen guardia nit anheimbs, sonder auf einem streyff geweßt.