Cod. 8961 - 418r-418v

Aus Prag von 26. Juli
   1] Allhie wirdet noch große preparation gemacht auf der ertzhörtzogen von Österreich unnd anderer hochsten personen ankhunfft, deren wellicher man khünfftige woche thuet verwarten, verhofftlich, es solle khain prolongation in der sache volgen, unangesechen, daz die Fürst(liche) Durch(lauch)t ertzhörtzog Ernsten ain fieber angestoßen und allberaith den 3ten paroxismum überstanden hat.
   2] Der s(ign)or(e) Vespasiano Gonzaga solle freilich morgen hie sein, bewüster convention beyzuewohnen inn namen der Khö(niglichen) Ma(jestä)t zue Hispanien.
   3] Man hat gleichwol verhofft, der hörtzog vonn Mantua wurde sich inn persona auch erzaigen, so will man doch jetzo daran zweiflen wie auch an des churf(ürsten) von Sachsen hieherkhunfft.
   4] Der Kay(serliche) Ma(jestä)t etc. nach Bonn abgesanter höroldt ist zue rugg widerumb hie angelanngt mit muntlicher antwurt, das daselbsten innligende kriegsvolckh gedenckhe, dieselbige statt für iren herren Gebharden truchsäßen zue deffendieren.
   5] Von Constantinopoly haben wir zeütung, daz der gros türgg den fridens anstandt gegen der Kay(serlichen) Ma(jestä)t etc. auf 8 jar lang prolongiert hat, anfachende von der zeit an, der jungste anstandt sich enden wirdet.
   6] Es will allhie verlautten, die spannische armata seye widerumb zue rugg nach Lisobona gelauffen wegen eingefallner infection under etlichen herren und auf der gedachten armata, und solle der englisch Dragua diser armata nach gejagt haben, von was orthen her aber solliche zeutung hieher khommen, ist inn gemain nit bewust.