Cod. 8961 - 518v-519v

Aus Praag von 23. Augusti 
   1] Auf 20. dito ist ertzherzog Carolus von hinnen widerum verruckht und den weg auf Lintz genommen, deßen gemahel hat underweg zue Irer D(urchlauch)t khommen solln.
   2] So ist ertzherzog Ferdinandus mit dero gemahel auf 22. dito von hie auch abgeraiset und den weg nach Pülsen genommen, dise alle solln inn Bayrn zu München zusamen khommen, erzherzog Mathias solle täglich von hinen sich auch erheben und nach hauß ziehen, ertzherzog Ernst aber noch allea  täglich alhie verharren, der österreichischen und ungarischen sachen wegen mit der Kay(serlichen) M(ajestä)t etc. sich weitter zue underreden.
   3] Und obwoln ertzherzog Ernst bey der Kay(serlichen) M(ajestä)t etc. angesucht, das Ir D(urchlauch)t nach Dreßden inn Sachsen raisen möchte, aldorten bey ettlichen anwesenden chur unnd fürsten sich zu erzaigen und freundtschafft zu machen, haben doch höchstgedachte Kay(serliche) M(ajestä)t etc. solches abgeschlagen, dieweil aber Ir D(urchlauch)t deßwegen noch starckh anhalten, hat man zu erwarten, ob die Kay(serliche) M(ajestä)t etc. consentiern werden.
   4] Was die Kay(serliche) M(ajestä)t etc. sambt den 4 ertzherzogen alhie tractiert und entlich under inen beschlossen haben, davon kan man ja gar nichts vernemmen, dieweil alles in so gar grossem gehaim gehalten wirdet.
   5] Der herr von Berrnstain ist auß Polln noch nit widerum zuruckh hie ankhommen, deßen man doch mit verlangen erwarten thueth.
   6] Sonst würdet alhie ausgeben, es seye ein türggischer chiaus inn Polln erschinen, der solle (von wegen des groß türggen) demselben könig abermals  grosse hilff angebotten haben auf den fall, der gemelte pollnische könig vom hauß Österreich oder andern mit kriegsgewalt angefochten werden solte.