Cod. 8961 - 772r-772v

Auß Wienn von 5. November anno 88
   1] Wie euch vor disem angezeigt worden, daß die unnseren wider die türckhen inn ober Ungern victoria erhallten, unnd daß derselben ein grosse anzaal erlegt haben, daß vervolgt noch also, unnd seindt der türckhen viel mehr gebliben alß man anfangs nit gewüsst.
   2] Der bassa von Ofen solle sich über der niderlag nit wenig bekhümmeren, besorgende, der groß türckh ine strangulieren möchte lassen, dann erst viel ansehenliche türckhen, alß sie nach gemelter niderlag anhaimbß khomen, gestorben.
   3] Die türgkhen sagen, der allt und jung Gott, auch die Muetter Gottes seyen alle drey wider sie gewesen, und daß ire sebel nit schneiden wöllen, sondern viel derselben enndtzway gesprungen, dargegen der christen whöeren wie stahel gehallten, die unngern, so von Ofen, Best, Gran unnd Stuellweisenburg heerauff khomen, zeigen an, daß die türckhen sich hardt beclagen unnd fürgeben, eß mangle inen von irem hauffen, der 11.000 zue roß unnd fueß alß sie außgezogen, gewester türckhen, unnd biß inn 7000 derselben, darunder 4000 janitscharn, derselben viel inn der flucht von den gehuldigten bauren erschlagen sein worden.
   4] Man will auch für gewiß außgeben, die unnseren haben Blauenstein und St. Andernet am Blattensee eingenomen, die türgkhen baider orthen, so darinnen befunden, merertheilß umbgebracht, und viel darvon gefangen, daß seindt guete zeitungen für die christenheit. Der Allmechtige wölle mit seiner hilff weitter zuesetzen.