Cod. 8961 - 785r

Auß Wien von 26. Novembris
   1] Alhie haben wir abermalß gewise zeittung, wie das der türgg die vöstung Gestes, darvon jüngst meldung geschehen, widerumb belägert und starkh beschossen, auch bestigen, aber Gott dem Herrn gedankht, mit schaden abziehen müessen bey verlierung 400 man, so inn sturm gebliben.
   2] So seindt die unsern auch widerumb ausgezogen mit inn 500 wägen und bey 15.000 starkh, Gott verleyhe inen sig, glükh und heyl, man ist gueter hoffnung, disen winter Stuelweissenburg zu erobern, daz verleyhe der liebe Gott mit freuden.
   3] Aus Canischa hat man underschidliche schreiben, das der türggen neulicher tagen inn Crabaten bey 800 durch der unsern nidergehauen und inn 500 gefangen. Der Herr verleyhe, dem feind weitterer abbruch geschehen möge.
   4] Was wir dann ferners aus Hungern haben, theil ich euch mit, es gibt ein zeitt hero mit dem türggen vil neues, gestern nach mittag hat man ettliche fürnemme türggen alher gebracht sambt derselben fahnen und roß. Gott gebe, der best vil hergebracht werden.