Cod. 8961 - 876r-876v

Auß Praag von 7. Decembris
   1] Neues alhie für dißmal wenig schrifftwürdigs verhannden, allein daß morigen tags der cardinal Aldobaldrino mit 70 pferden alhie einkhommen soll, dem werden Ihre Kay(serliche) etc. May(estä)t etc. stattlich alle zue pferdt enndtgegen ziechen, abgesandter inn Polnn gewest, waß er nhun daselbsten (wegen ertzhertzogs Maximiliani) außgericht, hat mann desselben noch khein wissenhait, allein daß er noch zuer zeit inn altter verhafftnuß gehalten würdet, dessen enndtliche verännderung unnd außganng hat man seiner zeit zuerwartten.
   2] Der duca de Sabioneta, deß königs auß Hispania obrister legat, ligt noch alhie zue hofe, mann höret aber von kheinem führhaben inn khrüegs sachen gegen Polln. Gott der Herr schickhe dermalen müttel, damit der frome herr widerumb auf freyen fueß khome und zue erledigung gebracht werde.
   3] Eß würdet alhie abermalß für starckh außgeben unnd darfür gehalten, daß Ire Kay(serliche) May(estä)t etc. albereidt resolviert seyen, mit eheistenn möglich von hier nach Wienn zuverruckhen, daselbst Ire May(estä)t etc. etliche täg über verbleiben sollen, vonn dannen iren weeg innß reich zunemmen, umb ein reichs tag alß inn deren stätt Regenspurg oder Niernberg verlegen unnd zuehallten, nach verrichtung desselben widerumben auf Wienn unnd Preßburg, daselbsten sie einen hungerischen lannd tag (wegen lanng verschobner hungerischer lanndt ständt sachen) gleichfalß für hanndt nemmen unnd darinnen zue tractiern, volgendts iren weeg widerumben auf hieher nach Praag zunemmen, ire kayserliche residenz unnd hoff halttung forther hin alda zue continuieren. Gott gebe, Ir Kay(serliche) etc. May(estä)t etc. fürhaben zue deroselbsten unnd ganntzem reichs nutzlicher forthpflantzung viel guetts verricht werde.