Cod. 8962 - 345r-346r

Auß Prag von 20. Junyo anno 89
   1] Auf nechst khünfftigen donnerstag 22. diß thuet mann deß pollnischen königs abgesandten cardinals Rassoville hieheer verwartten mit inn 500 reytt unnd guttschen pferde.
   2] Seyder deß jungsten haben sich die behaymbische stännde unnder inen verglychen und 18 persohnen vonn der rytterschafft unnd adel zum außschuß depudiert, die werden der pollnischen hieheer erwarttenden pottschafft (wegen der chron Behaymb) auff den gemelten accordo der jurament praestieren.
   3] Gleich zum beschlus bekhommen wür zeyttung auß Ungern, daß die türggen derselben orthen sich gar unrüerig verhaltten, berauben, verbrännen unnd blynderen sowol die huldigte alß ungehuldigte dörffer unnd fleckhen.
   4] So haben sich verschiner tagen biß inn 300 türggen sambt irem beeg vonn Weyssenburg auf den strayff unnd gar biß für Balota begeben, daselbsten den obrissten der vösstin Balota sambt noch zwayen oder drey andern ungefahr ausserhalb jedoch nechst Balota angetroffen unnd alßbaldt gefäncklich darvon gefüerth, alß aber die guarnison knecht inn Balota solches gewahr genommen, haben sye sich zue guettem theyl inn eyl auffgemacht, den türggen nachgejagt inn maynung, iren obrissten widerumb zuebekhommen, die seyen doch vonn den türggen zue ruckh geschlagen unnd biß für die porto Balota gejagt worden, darunder ettliche im lauff geblyben.
Demnach aber der leythenambt inn der gemeltten vöesstin die innlygennde soldaten auch ja bey iren ehren erinnert, es gebür inen, iren obrissten dem feynndt widerumb abzuenemmen, haben sye angelobdt, solches zuethun, ir leyb und leben darüber aufzuesetzen, also unverzogenlich (ausserhalb ettlichen weniger knecht, so zuer guardia inn mehr gedachten vösstin geblyben) ausgezogen, dem feynndt nachgesetzt, denselben ereylet unnd dermaßen angryffen, daß sye 54 türckhische köpff wie auch 48 gefanngne türckhen sambt ettlichen rossen erobert unnd den obrissten von Balota widerumb löedig gemacht unnd alles zue Balota eingebracht haben. Gott dem Herren lob unnd danckh gesagt, der verleyehe weytter glyckh wider die türckhische hund.