Cod. 8963 - 124r-125r

Auß Wien von 17. dito
   1] Von neuem haben wir wenig guets zueschreiben, dann daß alhie ein anfang fürgenommen würdet, die religion anzuefechten und alberaith von hauß zue hauß eingesagt, die predigten vor der statt durch die burgerschafft weiter nit zuebesuechen, mann würdet auch die burger teglich visitieren. Gott waist dessen außgang.
   2] Unser gouvernator erzherzog Ernst alhie ist diese wochen nach Prag verraist, unnd gehn der reden seines verraissens manicherlay. Gott der Herr welle alleß zum bessten schickhen.
   3] So hatt man glaubwirdige kundtschafft, daß ain grosse anzall tirggen inn Ungeren auf iren gränizvösstungen ankhommen, welliche vil dings, als von laytteren, hauen, schauflen und dergleichen zum krieg gehorige sachen, mit sich gebracht. Der Allmechtig welle ire böese anschlag wenden, bedeüttet nit vil guets.
   4] So ist vor drey tagen der herr Badian, ein fürnemmer obrister inn Ungeren und wol erfahrner kriegsmann, mit todt abgangen, dessen ableiben die tirggen geren gehört und wol content sein.
   5] Belangendt die gewerb unnd handlungen bey unnß, die seindt allenthalb dermassen beschaffen, daß solliche wegen der hörmannische falliment, welliches sich weitter dann vor disem nit bewust erstreckhen thuet, wie dann in 300.000 gulden allerhandt wahren durch den bassa von Ofen noch arrestiert ligen, da dann die hanndlungen mit den sybenbirgeren und ungeren steckht, so ligt dardurch alles darnider, obgleich wol gemelte sübenbirger zue Tebritz mit einer namhafften summa gelts unlangs ankhommen seindt, sie doch auß fürgefalnen ursachen widerumb zue rugg gezogen unnd ir fürhaben nit waagen dörffen, besorgende, durch gemelten bassa zue Ofen ein stumpffer begegnen mechte, dardurch bleiben alle bezallungen auß unnd die wahren verligen, welliches der bassa wol leyden mag, dann er den vogel inn seiner hannd unnd derzeit außzuewartten hat. Gott ergeze die schadleidende und richte alles zue guetem außgang.