Cod. 8963 - 154r-155r

Auß Praag von 6. Marzo anno 90
   1] Auß Polnn vernimbt man, die pollaggen haben etliche ansehenliche tatteren gefangen, die geben fir, haben 50.000 ducaten vom moscanwiter empfangen, daz sie inn daß lanndt Polnn fallen, dasselbige verhörgen unnd verwüesten sollen, wie dann vor disem geschechen.
   2] Die pollen haben bey irem großcanzler gar starckh angehalten, inen zuvergohnen, daz sie inn die Schlessien einfahl thonn mechten, daz inen aber gedachter canzler keineswegs zuelassen wellen.
   3] Der gemelte groß canzler habe neülichen einen manlichen leibs erben (bey deß jungst verstorbnen pollnischen königs Battori schwester ) bekhommen, da seye große freüd.
   4] Auf übermorgen 8. diß solle der polnisch lanndtag zue Cracau sein anfang nemmen und fürnemlich volgende articul tractiert werden.
Erstlich der könig Sigmundus solle sich erklären, warumben er auß dem königreich Polnn habe ziehen wellen.
Zum andernn, ob die pollaggen mit dem tirggen sollen fridt machen oder den krieg ferner fiehren.
Zum driten, waß man gegen den tatteren firnemmen wolle.
Zum vierten, waß deß moscawiters halben (alß der cron Polnn grosser feündt) zuthuen seye.
Zum fünfften wegen einer neuen contribution, auch wie man sonsten gelt aufbringen mechte.
Zum sechsten, ob den gaistlichen ire heüß und einkhommen (wie vor alters) geraicht sollen werden.
Zum sibenden zueberathschlagen (auf den fall) wegen königelicher waal, damit firohin ainigkait erhalten und deßwegen allerlay ungelegenhait, auch krieg und des landts verderben verhüet werde.
   5] So ist jungst vermeldet, daz erzherzog Ernnst den herren von Molart zum könig Maximilano und erzherzog Ferdinando von hinnen abzuraisen deputiert habe, wegen deß polnischen wesens mit Ire F(ürstlichen) D(urchlauch)t zue tractieren, daz hat noch also seinen forthgang.
   6] Herr Hannß Christoff von Hornstain alß deputierter von der Kay(serlichen) May(estät) etc. zue den chur- und fürssten ist von hinnen noch nit verrayset, der aufzug ist inn gemain unbewüsst.
   7] Jezo geth die sag deß heürats tractationes zwischen Kön(iglichen) W(ürden) Maximiliano und deß herzogen von Preissen freulin, deßgleichen mit erzherzog Ernnssten gegen dem freulin von Schweden uf handen seyen, ist aber beedes ungewiß.
   8] Die behäimbische landtstende haben der Kay(serlichen) May(estät) etc. fasst alle gethone begehren für 3 jar auf ein neues verwilliget, alß namblichen die contributiones wider den tirggen, auch underhaltung Irer May(estät) etc. hoflägers, und solle der abschid teglich publiciert werden.
   9] Heut dato abents wirdet der herr von Rosenberg der F(ürstlichen) D(urchlauch)t erzherzog Ernsten und den behaimschen herrn abgesandten ein gar stattliches bangget unnd nacht tanz gehalten haben.
   10] Mit der tirggischen verehrung thuet man starckh forth procedieren, so ist man mit dem gelt zum gewonlichen tribut alberaith auch gefast. Der Allmechtig verleiche, daz dardurch gueter bestendiger friden und rhuee der landen mögen erhalten werden.