Cod. 8963 - 346r-346v

Auß Prag von 23. Mayo anno 90
   1] Von Comorra haben wir zeitung, es seye zwischen den unseren von Viwer unnd den türggen ein kampff angestellt unnd beschlossen worden, daß uf jeder parthey 100 uf bemeltem kampff sollten erscheinen, wie dann der herr Palphy seines glaubens brief berait den  türggen zugeschickht unnd darauf forthgezogen.
Dieweill sich aber 200 türggen heernacher inn angesteltem kampff befunden, die unnseren auch vermerckht, daß der türggische kempffer vill ein bößer roß gehabt, hat der uf unnser seiten ein wolfshaut mit voller nägel angestöckht, alß nun die türggen solliches gewahr worden, haben sie begert, der unserige sollte solliche haut hinweckh thuen, dargegen die unseren gewöllt, der türgg solle sich unnseren kempffer gleich beriten machen, da aber solliches uf beeden partheyen nit volgen wellen, haben sie beeder seits zue wöhr griffen unnd darein geschlagen dergestallt, das die unseren daß feldt erhallten, der türgg uber 100 umbgebracht, thails verwundt, so hernacher gestorben unnd etliche inn der flucht im wasser ertrunckhen, der türggische kempffer aber, so sich inn der flucht auf einem baum zue salviern gemaint, ist von den unnseren herunder geschossen worden, wie dann auch vermeldet, sollen vill fürnemer türggen uf dem plaz todt gebliben sein, uf unnser seiten aber auch etliche wenige umbkhommen.
   2] Der polnische gesanndte ist von hinnen nach Sachsen verraißet, mann sagt, die Kay(serliche) May(estät) etc. habe ine mit einer gulden köttin von 500 cronen verehrt.
   3] Irer Ma(jestä)t etc. antwort auf sein  angebrachte werbung ist gewest, sovil Irer Ma(jestä)t etc. herrn brueder Maximilianum betreffendt, wellen Ir Ma(jestä)t etc. ime solliches zue wissen machen, auch die sachen neben annderer herren von Össtereich zue verneren bedacht nemmen.
   4] Waß aber der krieg wider den türggen anbelanngt, erachten Ir Ma(jestä)t etc., die pollaggen haben sich dessen nicht zubeförchten, sonnderen da sie selbst wellen, können sie diß orths bald eins werden, da es aber ir ernnst sein sollte, so seye daß hauß Össtereich uf jungst gehaltnem warschauischen lanndtag dermassen mit verkleinerlichen decrets angedaschet worden, daß die cronn Polnn nit ursach habe, einichen soccorso von dem selben zugewartten, bevorab weil es daß ansehen hab, samb seye die jezige polnische kriegsrüsstung zue einem annderen intento wider gegen dem türggen vermaint.
   5] Deß herrn Daniel Prinzen verrichten inn Polenn ist fast eben deß gleich formigen innhalts geweeßen wie der polnische gesanndte bey Irer Ma(jestä)t etc. selbsten angebracht hat, beneben vil freundtlichen erbietens deß polnischen königs auch ein brief an Ir Ma(jestä)t etc. von deß canzlers aigen hanndt geschriben, er hatt auch ein paßport erlanngt fir ein pottschafft, die Ir Ma(jestä)t etc. nach der Moscau abzufertigen vorhabens.