Cod. 8963 - 438r-438v

Auß Prag von 26. Juny anno 90
   1] Die Kay(serliche) May(estät) etc. seindt widerumb wolauf, haben sich am jungst verschinen fronleichmanstag bey dem umbganng (Gottlob) inn person erzaigt.
   2] Mann will alhie außgeben, der polnisch könig Sigismundus seye von der schweedischen lanndtschafft inn Schweeden berueffen worden haimbzuekhommen, dieselbige cronn zuebesizen, oder sie wellen einen annderen könig eleoieren, dann sein herr vatter, der alte könig von Schweeden seye etwas vonn synnen khommen, also daz er zum regement nit mehr taugenlich, solle auch etliche seiner räth selbs umbgebracht oder doch hinrichten haben lassen.
   3] Inn Polenn haben etliche stennde desselben königreichs (so dem groß canzler anhengig) zue Warschau ein conventum gehabt unnd sich einer sehr grossen steur (in lanndt zue Polnn allenthalben aufzuesezen) verglichen, bevorab auf bemelten ihres groß canzlers starckh anhalten under dem fürgeben, solliches gellt zum krieg zuegebrauchen wider den türggen unnd anndere, die sich feyndtlich der cron Polnn erzaigen würden, so vernimbt man doch jezo, der maiste thaill deß polnischen adels (wellicher dem groß canzler nit günstig) haben hernacher zue Oppotau (inn der provintz Santomier) ein besondere versamblung gehalten unnd under inen beschlossen, an obgemelter steur nichts zue contribuieren, dieweill es jeziger zeit die notturfft nit erhaischen, sonderen wellen auf dem notfahl selbs personlich an feynndt ziechen, scheint also, das die Polenn under inen selbs nit allerdings ainig seindt.
   4] Sonst thuet mann confirmieren, daz zue Posen über 150 juden- unnd 100 christenheusser abgebronnen seindt, unnd würdet der schaden an heusseren unnd kauffmans guettern uf 2 million gellt geschezt, daz feur sey aufgangen inn aines juden behaussung, wellicher wachs güeßen unnd daß selbig mit bech oder harz felschen wellen.