Cod. 8963 - 522r-523r

Ain andere auß Wien gemelts dato
   1] Von neuem alhie wenig, dann daz laider die statt Preßburg auf 17. July bey tagszeit samb gar miteinander abgebrennt, über 25 heüser nit stehen bliben.
So ist auf 21. paßato daz feur inn der vorstatt auch aufgangen und auf 42 heüser  hinweckhgebrennt, würdt sollicher schaden inn zehenmal hundert tausent gulden geschezt, und solle daz feür erstlich inn einem nonnenkloster außkommen und dermassen gebrennt, daz nit allein die tächer, sonder auch die gewölber angangen, ja gar in die weinkeller kommen, deren vil hundert eimer weins verbrent sein, summa, es ist ein unwiderbringlicher schaden abgangen. Gott der herr erbarme sich der verderbten armen leüth.
Item die vestung und stetlin S. Geörgen ist auch derselben zeit biß auf 14 heüser, so vom feur erhallten worden, inn grundt verbrent, daz also bey menschen gedenckhen sollich unversehen übel nie erhört.
   2] So hat man zue Turnau auch 2 feur gefunden, welliche gelegt worden, und habe man zue Preßburg fünf derselben brenner gefangen bekommen, die bekennt, daz der türgg inn 300 sollicher brenner außgeschickt, mit bevelch, alles wahin sie kommen und waz sie antreffen auf dem boden weckh zubrennen.
   3] Gesterigs tags seye die vorstatt zue Preßburg abermals inn 92 heüser weckhgebrennt, inn wellichem feür vil volckh, sonderlich junge kinder und kindtbetterin auch mit verdorben, welliches alles schröcklich zuhören und zu erbarmen.
   4] Sonst schreyet mennigklich nach regen, dann nit zu schreiben, was grosse hiz inn disen landen continuiert, daz also an vilen orten die erd brennt. Gott wölle alles zum besten keren.