Erwähnte Orte
Transkript
Aus Wienn von 8. September anno 90
1] Die von Viwahr seindt mit 130 pferden starckh auf ainen straiff geritten, aber vom feindt verkhundtschafft worden, deßwegen inen die türggen von Ofen, Pest, Gran und Schambeck an etlichen orten furgewartet, und obwolen die unnsern den rest angetroffnen hauffen der türggen geschlagen, zertrennt unnd biß inn 30 gefangen, ists inen doch widerumb abgetrungen worden, also das auch die unnsern mit 50 pferden unnd ungefahr inn 14 guetten gesellen verlust kaum darvon komen, gleichwoll haben sye 9 gefangne türggen, zwen köpf und bey 20 ross mitgebracht.
2] Die von Erlau inn Obern Ungern haben mit dem feündt auch zusamen getroffen, wie man schreibt, ist den türggen der syg bliben, auch etlich unnd 20 der unnsern gefanngen, dieselben sye gebunden unnd nach irem brauch (sonnder zweifl wegen Puganzo wider zurechen) gebundnerweiß strackhs nidergehauen.
3] Der obrist leütenanndt zu Raab hat 25 trabanten auff kundtschafft außgeschiekht, die seindt gar unnder Ofen hinab fast bey Talna komen, unnd als ein schiff auf der Tonau, darauf inn 200 türggen gewest, abwarz auf ein marckht fahren wellen, haben bemelte trabanten vom lanndt auff sye geschossen und balt anfangs den steurman, so das rueder gefüerth, gefölt, darauf ist das schiff bey ainem baum angelauffen und hangen bliben, wie nun die unnsern soliches gewahr worden, haben sye starckh auf die türggen zuegeschossen, under wellichen türggen 50 todt gebliben, der trabanten zween erschossen unnd am zuruckh heraufraisen 4 nidergehaut worden, die 19 seindt widerumb nach Raab anheimß komen.
