Cod. 8963 - 636v

Ain andere auß Wienn von 9. dito
   1] Von neuem alhie wenig, dann das auf 2 diß unnser kriegsvolckh inn 150 zu ross starckh von der vösstung Neuheusl auf guet glückh ausgezogen seindt ein straiff zuthuen, inn dem sy unversehenß auf den feündt gestossen, wellicher inn 2000 starckh gewesen, darob sich die unnsern was enntsezt, doch nit fliehen dörffen inn bedennckhen, das inn der flucht keiner mit leben darvon komen möchte, sich widerumb also beherzt gemacht unnd angefangen, zugleich mit ainem grossen geschray den namen Jesus angerueffen, inn feindt mit solichem erschrockennlichen ernst gesezt, das die türggen vermaint (wie die gefangnen sagen) nit menschen, sonder teüffel weren, schlagen den feündt inn die flucht, hauen deren bey 50 nider, darunter 8 fürneme gefanngne, den resst aller verjagt, seindt doch der unnsern auch 15 todt gebliben, diese (doch warlich unerhörte) victori, das auf 15 mann der türggen an ainen cristen gewest seindt, also diejenigen, so mit aufgesezt, Gott vil zu danckhen haben.
   2] Gestern abents umb 4 uhr ist Maximilian, erwölter könig inn Polenn, alhie anckhomen, dessen anckhunfft sich menickhlich wegen dero grosser demüetigkheit erfreüt. Der Allmechtig verleiche deroselben hinfürter glückhliche regierung.