Transkript
Auß Praag von 18. dito
Wir haben vergangnen sontag alhie vor nie erhöerte 3 grosse erdbedem gehabt, den ainen sontags zue abendt zwischen 5 unnd 6 uhren, den anderen hernach sontags inn der naacht, den driten gegen den tag, die haben die heüsser dermaßen erschittet, daz vil leuth auß iren heussern inn die gassen herauß gelauffen, vermaindt, daz sie versünckhen mechten, so sollen auch inn der alten statt über den plaz inn der selben naacht irer 6 mit wündtlichteren und uf sie andere 6 ein paar tragende gevolgt, unnd inn einer anderen gassen bey dem monschein ein mann inn roth lanngen kleideren, so sich immer zue gegen der erden genaigt, alß samb er gellt aufklaubete, unnd da er zue einem steinhauffen inn derselben gassen khommen, ist er verschwunden. Waß nun solliche praesagia guets mitbringen werden, ist dem lieben Gott wissendt, der welle seinen zorn von unß gnedigelich abwennden.
