Cod. 8954 - 118r-118v

Aus Wien von ultimo Aprill
   1] Was daz ungerisch kriegswesen belangen thuet, steht es daz zu erbarmen, es ist khain gellt, khain profiant unnd nichts verhannden, der herr Rueber ist allhie, hellt umb bezalung an, khan nichts bekhommen, also hatt er urlaub begert, unnd wie ich verstehe, so will er dem khönig vonn Spannia dienen.
   2] Zue Canisa seindt sie mit hilff an gellt, profiant unnd füeterung also verlaßen gewesen, daz 350 pferdt hungers halben weichen mießen, liegen 1 ½ meill vonn hinnen, ist der haubtman Braun, sodaz obrist ampt biß hero verwalten, gestern auch allher khommen, man ist inen 26 monat schuldig, wann sie nur profiant gehabt, hetten sie noch lännger verharrt. Gott well, daz der türgg nit darein zeche unnd sich umb Canisa annemme.
   3] So seindt die zue Raab auch ungedultig, zuebesorgen, sie werden ime auch also thuen, haben ain gesanten herauf geschickt unnd nur daz aussteende flaisch gellt begert, so 2700 guldin anlaufft, darfür hatt man inen 250 guldin fürgeschlagen, es ist hallt trauen unnd glauben verloren unnd nix mehr zueversätzen verhannden, unnd ohne versatzung oder pfanndt will man nichts mehr herleihen, und wie es sie ansechen laßt, wirt es lettstlich brechen mießen. Darvon gnueg.
   4] Sonnst feiren die türggen inn Ungern nit gar, haben neülicher tagen denen von Camorren ettliche khnecht nider gehauen unnd ettliche gefangen, also haben auch die vonn Viwar ettliche wenige personen verloren, ann baiden gemelten orthen biß inn 30 oder 40 thodt unnd gefangen dahinden pliben, yedoch haben die türggen iren thaill auch dahinden gelaßen, seindt bey Viwar 70 der unnsern, ann 200 türggen gewesen.