Cod. 8954 - 130r-131r

Aus Wien von 8. Mayo
   1] Inn Sibenbürgen seind allenthalben die musterungen beschechen unnd den landtleüthen bey verlierung all ir haab unnd guet auferlegt worden, inn steeter rüstung zue sein, damit sie täglich, wann sie aufgemanet werden, fort ziechen khönden, wohin es gemaint, khan man noch nit wißen,  vil geben für, es seye gegen dem Marckhazy, wellicher zue Constantinopoly umb Sibenbürgen steets anhalte, andere, da der khönig vonn Polln mit dem moscowiter frid machte, daz Sibenbürgen unnd Polln sich umb Oberhungeren annemmen mechte.
   2] Daz volckh, so inn Sibenbürgen für den khönig inn Polln gemacht, ist for 3 wochen im abzug geweßt, mit inen zeucht der Barbiel Jory unnd Bathory Andriasch, auch Bathory Balthasar, des khönigs vonn Polln vetter, dem solle des khönigs vonn Schweden dochter vermählet werden, der weyda inn Sibenbürgen hatt ettliches seines hofgesündts unnd sonnst alle notturfft auch mit geben.
   3] Sonnst wirt gesagt, der friden mit dem moscowiter solle geschloßen werden, dann widerumb ain ansechliche pottschafft mit 600 pferden zum khönig vonn Polln aus der Moscau sammtäglich habe ankhommen sollen.
Unnd habe der khönig vonn Polln kürtzlich ain ansechlichen khuntschaffter gefangen, wellicher inn der tortur bekhant, der moscowiter seye aigentlich entschloßen, da der khönig vonn Polln noch ainmall auf ine ziechen wurde, allem seinem begeren nachzuekhommen, wie dann auch ettliche fürnemme leüth vom moscowiter abgefallen unnd sich ann khönig vonn Polln ergeben haben, welliche eben daz auch saagen.
   4] Janicula weyda inn der Moldau soll mit vil guet, goldt unnd silber daselbsten endtrunnen sein unnd zwischen Sibenbürgen unnd Polln auf Oberhungern zue seinen weeg genommen, dann der türggisch kayser ainen anderen weyda inn die Moldau gesetzt soll haben, weniger ist nit, daz Janicula auf seinem heraus raysen mit dem herren Rueber practiciert hat.
   5] Perpostonary Valentin, der fürnemmbsten hauptleüth ainer uf unser seiten inn Hungeren, wellicher anno 79 auch inn Polln geweßt, will weiter nit pleiben, weill man ine (seinem vermainen nach) nit halten will, sonnderen zuem khönig inn Polln ziechen, doch mit dem erbieten, daz er der Kay(serlichen) M(ajestä)t etc. treu sein unnd nach vollbrachtem krieg sich widerumb ann sein stell zue presentieren.
   6] Unnsere teütsche reütter vonn Canisa, welliche verschiner tagen biß gehn Himberg unnd Schwachet nur 2 meill vonn hinnen gelegen, seindt (also baldt ir rittmaister Bartlome Brau zue inen mit bevelch vonn Irer F[ürst]l[ichen] Durch[lauch]t gelangt unnd inen ir all zue freuenlichs hieher raysens verhabt und ettwaz wenigs vonn gellt mit gethaillt) gestrackhs widerumb auf Canisa gezogen, die halten sich jetzo inn der spanschafft Edenburg unnd gewarten des vertrösten fürlehens auf Canisa, bey inen seind auch baider hauptleüth, des Springens unnd Steinbeis haggenschützen, deren seindt 100.
   7] Dem Lasckhy seind vonn khönig inn Polln die 13 stätt (so uf den gränitzen zwischen Polln unnd Hungeren ligen) eingeben worden, er ist ain seltzamer gesell unnd er dörffte Irer Ma(jestä)t die ime erzaigte guete freündtschafft widerumb bezalen.