Cod. 8954 - 7r-8r

Auß Wien vom 7ten Januario anno 81
   1] Schreiben auß Poln, so zu Groduo umb den zwainzigisten December bestetten, deß vor zwaien monaten geschriben worden, alls der könig Velikulukha unnd acht schlösser, so dem moscoviter zugehört, erobert, bey eroberung Velikaluka sein die […]  von des moscoviters porthen bliben, der könig sey darauf wider gehn Vilna khommen und sein maistes kriegsvolck inn der Moscau gelassen, Ifflandt hab er damit schier gar wider bekhommen. Der moscovitter hatt sich niendert sehen lassen, sein volckh, so er auf Toropetz zugeschickht, welches maistenthails tarttern unnd uber 10.000 nit warn, hatt er mit wenig seines volckhs geschlagen unnd abtriben, darunder zwen seiner ansehenlichen weyda oder kunisten gefangen, der tartterische fürst hatt auch seine gesandten zum könig geschickht, ime wegen des guetten fürgangs inn seiner expedition congratuliert, in ermant, er soll davon nicht aussetzen, biß her hab er im nicht hilff künnen laistten, weil er den türggischen kayser sein hilff müessen schickhen, wils aber hinfür thun, etlich rechnen ims auß, das er sich auch vor dem könig forcht, wann er mit dem moscovitter zu reden khomme, er sich gegen den tarttern wennden würde.
   2] Moscovitter gibt stolze antwort und thuet doch wenig zue gegenwöhr, hatt er sich erpotten, zehen schlösser wider zugeben, der könig will aber alles haben, das der von Poln durch seine vorfaren entzogen worden, der könig würdt jetzt ein lanndtag halten des vorhabens, den krieg fortzusetzen unnd dem moscovitter, da er im nit sonst entgegen khombt gar inn seiner residenz zu Moscau haimbzusuechen, alles volckh inn Littau ist willig und begirig darzu, weil sie sehen, das sie einen so dapffern und glicks seligen könig haben.
   3] Erasin Braun ist gehn Canisa, würd denselben bevelch ein zeit aldort verwalten.
   4] Wer der  thätter, so graf Niclasen von Salm seligen vergeben, ist noch nit wissent, auch will man niemandt darüber so lautter bezeugen, darff weitter darunder nichts fürgenommen werden.
   5] Die türggen sein noch allenthalben still, auß dern was et wo mit hinwegckhfüerung 2 oder 4 personen am ufer bei Camorn, item inn den negsten dörffern vor Vywar, damit sie des gebeu halben ain zungen hatten, da inen auch entgegen zwen vor Kockhorn entzuckht worden beschehen.
   6] Die schreiben, so dem bassa von der Kön(iglichen) M(ajestä)t und Irer D(urc)h(lauch)t im negsten Decembris etlicher geringen einfall halben gethon worden, hatt der bassa nit verantwort, sonder an die portten geschickht, dann auch beschaidts zuerwartten, daraus abzunemmen, das ir regiment nimmermehr so frei unnd sie mit grossem aufmerckhen herforn, dasselb füeren müessen.
   7] Heut khommen schreiben von Constantinopel vom 12ten November, haben anderst nichts, als das der soltan wegen des beegs in Bostega niderlag übel zufriden
heraustro[…] , aber gleichwol nichts würckhlichs angriffs verschafft worden.
   8] Der persianisch frid steet in den alten terminis unnd wie man dortten segt, will persier anderst nit schliessen als der zuvor mit seinen vorfordern gemacht und gehalten worden.