Cod. 8961 - 806r-806v

Auß Wien von 19. dito
   1] Wir haben alhie gewise brief, daz die unsern jungsthin ein treffen bey Stuelweißenburg gethon und zu beiden seitten vil todt gebliben, wie es aber umb Stuelweissenburg mit eroberung derselben statt im grundt beschaffen ist, darvon noch kein gewißhait verhanden.
   2] Der herr Balfy hat ein grosses übersehen, seind ime inn 400 guetter redlicher kriegsleut durch den feind nidergehauen, er selbsten mit müe entritten, Gott wölle dem feind steuren, zu besorgen, ohn ein grossen veld zug nit abgehn werde.
   3] Und solle auf nechst khönfftige wochen der herr von Plab, so ein geborner nürnberger und der Kay(serlichen) M(ajestä)t etc. fürnemmer räth einer gewest, vom leben zum todt gericht werden wegen falscher practikhen, sigl und briefen, damit er umbgangen, welcher die straff (wie man sagt) wol verdient soll haben. Gott wöll ime erkantnuß seiner sünden verleyhen und das begangen übel gnädigelich verzeyhen.