Cod. 8962 - 367r-368r

Auß Praag von 28. Juny anno 89
   1] Am vergangnen sambstag ist die pollnische pottschafft, der cardinal Radavil und weywoden gar stattlich zue roß unnd gutschen alhie ankhommen, ungefahr mit 400 persohnen, die haben gesteren bey der Kay(serlichen) Mey(estä)t etc. kurtze audienz gehabt, seyndt vonn einem schlössinger, dem herzogen von Mynssterburg, einem össterreicher, graf Sigmunden von Hardeckh, unnd einem behaymb, dem altten Schenelizkhy, gehen hof beglayttet worden, seyndt mit grossem pompo unnd mit inn 250 schöner rossen auffgezogen, wie man sagt, sollen übermorgen die stände unnd die pollackhen den ständen hin wider den ayd thuen, waß nun volgt, gibt zeyt.
   2] Sonsst haben wir auch alhie, daß der pollnische könig zue Crassmista bey der F(ü)r(stlichen) D(u)r(chlauch)t etc. ertzherzog Maximiliano ankhommen sambt andern fürnemmen herren, unnder anderen auch der hertzog von Ostrag, wölcher für sein persohn allein 2800 roß bey sich gehabt, und habe der gemeltte könig alßbald (auf instruction seines praeceptoren, deß groß canntzlers) Irer D(u)r(chlauch)t etc. seine sachen selbst mündtlichen latteinisch proponiert und fürgebracht.
Heernacher seyndt sye zue tisch gesessen und das myttag und abendtmal zuegleich (weylen es spatt gewesen) eingenommen.
Deß anderen tags früee habe Ir May(estä)t etc. wider mit Ir D(u)r(chlauch)t geredt unnd seinen abschid genommen unnd forth gerayset, die fürnämbsste herrn aber bey Irer D(u)r(chlauch)t geblyben.
Der khönig hab Irer D(u)r(chlauch)t einen gutschen wagen, so innwendig durchaus mit goldt gestept sambt 8 schöner gutschen pferdt darzue, ittem drey zeltter, zwey türckhische unnd ein arabisch roß verehret, der jung hertzog von Osterag 6 schöner gesprengter guttschen pferdt, deren haar hiezue lanndt gar seltzam, noch dergleichen haar ein reyttroß unnd einen tartarischen bueben (so eines fürssten sohn sein soll) praesentiert, unnd solle der altte von Ostrag auch ein stattliche praesent für Ir D(u)r(chlauch)t zuerichten lassen.
Die gemeltte pollnische sollen sich vil gegen Ir D(u)r(chlauch)t erbotten haben, waß nun volgt, erwarttet mann alhie mit verlangen.
   3] Was sich zwischen den unsern vor Ballota und den türggen von Weyssenburg verlauffen, darbey bleybt es also, wie jungst anzaygt ist worden.