Cod. 8962 - 606r-606v

Auß Prag vom 24. Octobriß anno 89
   1] Gleich jezo khombt mir aber schreyben von Comoren, vermeldet unnder annderm, daß die unnsern abermalß mit ann 3000 starckh drey meil unnder Ofen gewest, den bassa gelockht, hat aber nit herauß gewölth, auch nit ein ainigen schuß auf sie thuen lassen, seindt sie also unverrichter sachen widerumb anheimbß gezogen unnd haben nichts allß ettlich hundert schaf angetroffen und mit inen weckh getryben.
   2] Sonnsst vernimbt man, der groß cannzler inn Pollen habe umb schwarze reütter herauß geschryben, die werden ime nit passiert, derowegen wol zuvermuethen, er möchte inn khurz bey Irer Mey(estä)t etc. hilff ersuchen, ligt noch ungefahr mit 11.000 starckh bey reüsischen Limburg verschanzt.
   3] Auf 18. diß seindt Ir Khön(igliche) Würde Maximilian von hier nach Mergetheim verruckht und ire abgesandten alhie hinderlassen, die sein zum churfursten von Sachssen und Brandenburg, waß ir verrichten, ist unbewust, Ir Khön(igliche) W(ü)r(den) solle gleichwol inn khurz wider hir sein.
   4] Der schweed ist noch forth auß dem landt und heim zu seinem vattern, vermuettlich werde aussezen und nit mehr inn Pollen khommen, anndere wöllen es gleichwol nur für ein bloßes außgeben halten, daß schweed khönig inn Polen in salutato hospite heimb gezogen und nit widerumben khommen solte.
   5] Die türggen seindt vor Cammeniz widerumb abgezogen, haben deß cannzlers mit seinem volckh nit erwarten wöllen.
   6] So seindt die tartaren auch widerumb zueruckh getriben worden, die haben grossen schaden gethon, yedoch iren zehenden auch dahinden gelassen.
   7] Eß seindt abermalß viel gesanndte alhie, alß Maynz, Cöllen, Tryer, Wirzburg, Salzburg, Regenspurg, Aychstett, Passau, Freyßingen, Innsprugg, Mönichen, Leüchtenberg, Gülch, Baaden unnd anderer fürsten der catholischen, unnd sollen der augspurgischen confessions verwandten abgesanndte inn khürz auch widerumb hieheer khommen, da würdet es deß straßburgischen und aachischen wesens halben viel  disputierns geben, unnd haben obbenannthe der catholischen stännde gesanndten alberait bey Irer Mey(estä)t etc. die erste audienz gehabt.