Cod. 8957 - 105r-105v

Aus Prag vonn 12. Apprill neuen callenders
   1] Gestern haben wir allhie zeitung aus Ungern bekhommen, daz die unserigen ainmall vonn Vesperin die halt gestoßen ann dem orth, wa die türggen allezeit pflegen fürzuziechen, wie sie dann alle wochen 2 unnd 3 mallen daselbst herein gestraifft, also hat sich begeben, daz der beeg von Kopan inn die 500 starckh auch zue denselben hallt khommen, ettliche zum Plattensee gehn Bolondwar (daz ist ain türggisch heüßlin nechst am Plattsee gegen Ennod über) geschickht, welliche die hungerischen schiff sollen weeg  nemmen unnd rauben, das wurden die vonn Tiban denen von Vesprin alsobaldt zue wißen thuen, wann dann die vestrriner denen zue hilff wollten ziechen, hetten sy auf diß orth mießen khommen unnd weren den türggen also inn ir hallt gefallen.
Also hat sich daz plätlin umbkhert, daz die türggen auf unsern halt getroffen, unnd weill die unseren aus dem holtz von allen orthen heraus auf sy gerenth, haben die türggen baldt die flucht geben, darüber der beeg selbst unnd noch 50 mit ime gefangen worden, so haben die unseren auch 90 roß, 13 fanen, ein hördrumell, 17 khöpf mit inen haimb gebracht.
Der unserigen waren vonn Vesprin 250 zue roß unnd fueß, unnd vonn Pallatha 50 pferdt, so ist der unserigen khainer umbkhommen, allain seindt 8 geschädigt worden, doch nit thödtlichen.
   2] Herr Hanns Rueber veldt obrister ist for wenig tagen mit thodt abgangen, hat ine der schlag zum andern mall dorten im November getroffen, Gott welle seiner unnd uns allen gnädig sein, wir haben ain dapferen hölden wider den erbfeindt ann disem mann verlohren.
   3] Diese tag schickhen die Kay(serliche) Ma(jestä)t gesante zue Sachsen unnd Brandenburg neben anderen sachen, doch maistthaills deß neuen callenders halben, was daselbsten ausgericht, würdet Augspurg auch volgen müeßen, unnd ist nit weniger, daz Ir Kay(serliche) Ma(jestä)t unwillig werden, umb daz sy deß gedachten neuen callenders halben sovill überlauffens unnd unruhe haben, ist auch nit zue zweiflen, da es mit disem callender nit so weidt khommen were, er wurde woll länger auf der banckh sein liegen pleiben.
   4] Herr Jacob Kurtz geweßner hofrath, ist diese tag geheimer rath worden, wellicher der aine ist so zue baiden churfürsten gesant würdet.