Cod. 8963 - 124r

Auß Prag von 20. Feberer anno 90
   1] Dem herren von neuem, waß sich seidt nechstem verlauffen, mitzuethaillen, ist doch sonders schrifftwürdigs nichts fürgangen, allein daß Ire F(ürstliche) D(urchlauch)t erzherzog Ernnst vorgesterigs tags gegen abent mit wenig bey sich habenden hofgesündts Gott lob glickhlich wol ankhommen, waß nun Ire May(estät) etc. mit deroselben zue tractieren, auch wie der firsteehende landtag ablauffen mechte, berichte den herren mit erstem.
   2] So will abermals verlautten, daß nach endung berüerts lanndtags Ire Kay(serliche) May(estät) etc. den herren von Rassdorff etc. wie vor disem beschehen sollen, innß reich abzueferttigen anordnung gethon, vermuetlich wegen deß erbfeündts und reichstags, dann Irer May(estät) etc. von mehr orthen gewiße schreiben zukhommen, der türgg starckh praeparation zue wasser und lanndt thuen solle, dessen intento mechte mann inn zeit erfahren. Der Allmechtig welle allem böeßem fürkhomen und steuren, wie dann Ire Ma(jestä)t etc. genzlich entschlossen, mit erstem ein starckhe guardiam von wolerfahrnem kriegsvolckh wegen erbfeündts unnd gefahrlicher zeit sich gefast zumachen, also daß nit vil guets zuegewartten.