Cod. 8954 - 140r-140v

Aus Prag von 7. Juny
   1] Den verschinen sambstag auf 3. dis ist die F(ürs)t(liche) Durch(lauch)t ertzherzog Caroll mit dero gemahell und freulin, auch bey sich habenden hofgesündt widerumb vonn hinnen und nach Dresten  zuem churfürsten inn Sachsen verraisst, vonn dannen aus sy iren weg nach Minchen nemmen, aber auf dismal nit mehr hieher, sondern ain andere straßen rhaisen sollen.
   2] Man sagt noch, die kayserin solle auf primo July gewis vonn hinnen raisen unnd iren weg durch der F(ürs)t(lichen) Durch(lauch)t ertzherzog Carols lanndt nach Italia nemmen, darumben Ir Durch(lauch)t die kayserin jetzo allhie gebetten soll haben.
   3] Sonst gibt man aus, der khönig vonn Denmarckh seye nur selbs ander auf der post currier weis zue Dresten einkhommen, daselbsten sollen sich ettliche der augspurgischen confeßion zuegethone chur und fürsten personlich und ettliche räthe gar baldt versammlen. Was die tractation sein werde, khan man noch nit wißen.
   4] Die Kay(serliche) Ma(jestä)t etc. khommen noch nit herfür, wellen aber hoffen, es solle sich inner wenigen wochen also schickhen, daz Ir Ma(jestä)t etc. ain mal widerumb gantz früsch unnd gesundt sich werde sechen lassen.