Cod. 8954 - 186r-186v

Aus Wienn vom 16ten July anno 1581
   1] Zu Bersontze zwo meil von Canischa gelegen, sein diese tag funf beegen inn die drithalb tausend starckh beyeinander gewest, warauf ir deliberation gestanden, khan man der zeit nit wissen, ohne zweifel aber werden sy etwas starckhs im synn gehabt haben, welches aber der zeit one frucht abganngen, unsere teütsche pferdt und archibusier zu Canischa, ungefahrlich bey sechtzig, haben mit achtzig türggen zu roß ein scharmützl gehabt, dann sy ohngefehr am ausraissen aufeinander troffen, darüber sein sechs und zwainzig türggen auf der wahlstat tod bliben und vil darunder hefftig geschedigt worden, als das man die mit fünf wägen hinwegkh füeren müessen.
   2] Bey der neugepaueten fösten Viwar sein jetzo noch der zeit auch drey beegen beyeinander, zu denen soll der bassa von Ofen auch selbs personlich khummen, wie die zeittung lautten, sollen sy umb denen ortten nit weit von der Thonau ein castell aufrichten wöllen, damit den unsern das straiffen an die Thonau gewöhrt werden müge, das wierdet aber auch die zeit mit sich bringen.
   3] Der Kay(serlichen) M(ajestä)t etc. pottschaffter Joachim vonn Sintzendorff, an dessen stell herr Fridrich Preiner gehn Constantinopel fürgenummen worden, ist auf dem hieher raisen, hat auch diese täg zu Ofen ankhummen sollen, die kundtschafft lautten, das der bassa hin und wider ausschickhe, damit er zungen bekhummen möge, damit er nur zu seiner ankhunfft etwas clagweiß mitzubringen habe.
   4] Die türggen umb Temeßwar sein gegen Sibenbürgen noch starckh inn rüstung, welichem theyl aber noch die hilff vermaint, ist ungewiß, so will man auch von des königs aus Poln ankhunfft starckh reden, dann etlich geben für, der fride mit dem moscowitter sey beschlossen und khöndte derhalben nit ohn sein, der könig müesse sich umb das landt annemmen.
   5] Ettliche confirmiern auch den frid inn Persia, aber die maisten khundtschafften wollen nichts darvon wissen, sondern gehn dahin, das gleichwol der fride auf des türggen seitten gesuecht werde, der sey aber daher noch zweifenlich, das erst neulich bey fünf und zwainzig türggen zu dem persianer gefallen sein.