Cod. 8954 - 27r-27v

Aus Wien vom 29ten January anno 1581
   1] Den 21ten ditz monats sein die beegen unnd türckhen von Sigeth, Koppan, Funfkirchen, Sockhlioß, Gersenz unnd Secken inn die 1500 starckh eingefallen und 4 am Plattsee gelegne dörffer abgebrandt unnd damit inn die 300 person aufgehebt, als aber die freüttenschuß uberall an den ortten castellen ergangen, hatt sich der hauptman zu Papa, Maithini Laßlo mit andern haubt und dienstleütten der ortten biß inn die 500 zu roß unnd fueß gesamblet und dem feindt nachgezogen, den sie auch gleich im abzug mit den armen gefangnen christen angetroffen, haben also den feindt angriffen, irer inn die 200 erlegt, etlich vil gefangen, die anzal ist noch unbewustt, unnd die armen christen erledigt.
   2] Von Ofen vernemmen wir, das under den türggen auf drey jar lanng krieg wider den persianer von neuem außgeschrien, hergegen sei den beegen unnd türggen allenthalben dieser ortten bei leibstraff verpotten, nichts freithättigs wider den frid fürzunemmen, ettlicher gränitzer, sunderlich in Bosna, sollen zum krieg in Persia abgefordert sein und sey nicht zuschreiben, welche ein grosse teürung allenthalben under den türggen sunderlich zu Constantinopel, sey, sunderlich seyen auch neben dem das der Sinan bassa gewißlich hart geschlagen, er selbst auch kaum davon khummen, den türggen inn die vierzig tausendt camel mit proviand genummen worden.
   3] Von dennen wirdet unns auch geschriben, das umb die statt Damasco ein neuer prophet auferstanden sey, der gewaltig vil volckh an sich gebracht unnd dieselben seine junger nennen soll.
   4] Auf den sontag invocavit ist ein beheimischer unnd auf den 20ten February ain österreichischer landtag außgeschriben worden.
   5] Die F(ürs)t(lich)e D(urchlauch)t etc. seind nach Prag bei der Kay(serlichen) M(ajestä)t, unnd wie man under der gemain sagt, sollen Ir D(urchlauch)t biß nach beschehner beheimischer landtags proposition zu Prag verharren.