Cod. 8954 - 300r-300v

Auß Wien vonn 3. November
  1] Zur besichtigung unnd beschreibung der einkhommen zue Palata ist ain raitenier vonn der hungerischen cammer (khumut genant) unnd noch ain bevelchs mann vonn Raab dahin geschickht worden, dieser ist sampt dem leütenant aldorten (Ormandi Peter) unnd etliche wenige hußaren ins feldt hinaus spazieren geritten, denen haben ettliche weisenburgische türggen (so inn ainer halt gewest) fürbogen, denn commissari unnd noch ain hussarn nider gehauen, die anndern seindt entrunnen, allso ist unns die erste beschreibung nitt wol gerathen.
   2] Die vergangne tag seindt die vonn Tockhay unnd Erla außgezogen, weil sie kundtschafft gehabt, die türggen ainen fleckhen Muhy, nit weitt von Onad überfallen wellen, weyl sey aber khaine türggen angetroffen, am zue rugg ziechen inn aine dorff rasten wellen, khommen unversehens die türggen, wirdet lerma, die ersten, die aufsizen, seind hinaus gerant, weyll sie ohne alle ordnung khommen, leichtlich geschlagen worden.
   3] Die teütschen reütter unnd archibusier hatt Carl Rueber dannacht inn ain ordnung gebracht, unnd obwol die hußaren, deren über 400 gewesen, etwas unordenlich entplochen, haben die türckhen starckh ann die teütsche reüter unnd archibusier gesezt unnd bis ann die nacht mit inen gescharmizelt, yedoch inen wenig abgewunnen unnd allso noch gehn Erla ohne sonndern schaden khommen.
   4] Auß Ofen haben wir, das vonn disem scharmizell 12 hungern unnd ain teütscher dem baßa dahin seyen gebracht worden, wievil der unsern allenthalben pliben, haben wir noch kain wissen.
   5] Vonn Ofen haben wir auch, das der sultan kriegsvolckh gegen Persia hinein legert, habe der baßa aber sich entschuldigt, dann da solliches die christen innen wurden, mechten sye leichtlich gegen der entplosten gräniz was fürnemmen.