Cod. 8954 - 47r-47v

Aus Wien von 5ten February anno 1581
   1] Das die niderlag zwischen dem persianer unnd türggen beschehen unnd der Sinan bassa sehr hart geschlagen worden, das continuirt noch, er muesse auch dieser seiner unfürsichtigkheit halb inn grossen sorgen stehen.
   2] Von Raguß würdet unns für gewiß geschriben, der türggische kayser sei tods verschiden, sey zu Constantinopel im reitten vom fallenden siechtag angegriffen worden, vom pferdt gestürtzt unnd den hals gebrochen unnd dessen geb umb sovil dest gwissere anzug, dieweil alle brieff von dem vierste in Neaplis unnd Sicilia wie auch von den venedigern widerumb mit großer eyll abgefordert unnd ettlich hundert griechen sich von Constantinopel auß under des königs von Spania schutz gethon haben sollen, diß geschray ist gleichwol ein zeit herumb alhie auch ganngen, mann hat ime aber bißher nit allerdings glauben geben wollen.
   3] Mit der türggen niderlag, so die von Papa wider den 21ten January erhalten, ists noch richtig unnd sein der türggen uber 400 erlegt unnd 80 gefangen unnd vil stattlicher haubt roß, auch 3 aga lebendig erobert.
   4] Es haben die von Erla vor 14 tagen auch ein scharmützl mit den türggen gehabt, darunder der türggen auch biß inn die 100 umbkhummen unnd gefangen worden. Gott gebe dieser zeittungen vil.
   5] Die neu vesstin Vywar zwo meil von Komorn unnd 4 von Gran gelegen, so im verschinen herbst auf freien wasen zu pauen angefangen, ist nunmehr vast gar zue wöhr aufgebracht worden, aber diese verschine tag wöllen unns khundtschafften khummen, dem bassa von Ofen seie bevelch khummen, dieselbe mit gewalt einzureissen, wo solches nit geschehe, soll er ungestrafft nit hingeen, inn sunderhait darumben, das er ime eine vessten vor der nasen hab pauen lassen.
   6] Die weidischen inn Sibenbürgen seind inn grosser rüsstung, wie auch ein musterung zu Großwardein diße tag herumb gehalten worden, dieselb solle aber wider die türggen, als die zwen ansehenliche weidische fleckhen zur huldigung begeren, welches aber die weidische nit zuzegeben gemaint, angesehen sein, im fahl die türggen einen gewalt brauchen wollten, denselben widerstandt geschehen möchte.