Cod. 8954 - 51r-51v

Auß Wien vom 11. February anno 81
   1] […]  Alltsoll, einem gränitz hause vor den hungerischen pergstetten, hat herr Geörg Barbaritsch obrister daselbst den türggen ein copy prechen zuhalten zugesagt, darauf der beeg von Sechen mit hundert türggen auf den 28. January erschinen, in welchem copy prechen drey türggen strackhs tod  auf dem platz bliben unnd ir siben gar hardt verwundt, der unsern aber allein drey one gefahr deß lebens geschedigt worden, herr Barbaritsch hat den beegen selbs ein copy von deß röm(ischen) kaysers gesund wegen zubrechen, unnd er ime von seines deß türggischen kaysers zubegegnen begert, aber der türgg hats abgeschlagen, gleichwol ain andern beegen Olay an sein statt benendt, der hat die schantz nit annemen wollen.
   2] Zwischen Calo und Saggmar haben die türggen ain einfall gethan unnd drey dörffer mit etlichen 100 personen aufgehebt, die unsern, alß die dessen khain khundtschafft gehabt, haben diß nit wehren khönden.
   3] Im windischen land und dem castell Ibaritsch sein die türggen umb den 22. January negst verschinen in die 3000 starckh zue roß und fueß eingefallen, in dem aber 70 unserer fueßkhnecht auf den vorzug gestoßen, denselben zertrent unnd der türggen siben erlegt, hat sich der gantze hauffen gewandt unnd sein abzug genommen, also daz ainicher weiterer schadens ausser aines fueßknechts, so hierunder tod bliben, nit geschehen.
   4] Der obrist windischer gränitz Veit von Hallegg hat den türggen alßbald mit ainem zimlichen hauffen nachsetzen lassen, aber die türggen sein gewarnet worden, hat also gedachten von Hallegg anderst nichts ausgericht, allein daz er under dem türggischen castell Zellenzai  ain ansehenlichen türggen bekhommen hat.
   5] Vor acht tagen haben wir zeittung von Raguß gehabt, daz der türggische kayser tod sein soll, yetzo volgt gleich dannenher daz widerspiel. Gott geb, daz es sein lang leben nit sey.