Cod. 8954 - 80r-81r

Aus Prag von 14. Marty
   1] Auß Pollen von Warschau den 26. verschinen monats datiert haben wir schreiben, das obwoll des moscowiters orator daselbsten beim könig ankhommen, umb ainen friden zue tractiern, so befinde sich aber auf sein mostowiters sovil unbilliche begern, das nun hieraus will vermueth werden, es werde durchaus gar zue khainem friden khomen.
   2] Der könig hatte gleichwoll auf dem landtag daselbst soliche firgebrachte fridens articul zue pronponieren bevolchen, unnd das die lanndtständt hieriber decernieren, was enndtlichen hierinnen zuetuen unnd firzuenehmen sein mechte, nicht desto wenig er aber trinnge der könig vast darauf, umb den krieg zue underhalten, die stännde aber beschwären sich der großen steur und auflagen zum höchsten, könden oder wüsten soliche, noch vill weniger die neue aufgerichte contribution, nit gedulden.
Unnd obwollen (wie unnder anderm vermeldet) inn demselben königreich großer manngel sich an gelt befinden, jedoch erzaigten sich die herren unnd edelleith des lanndts inn irer haushaltung, claidung unnd anderm vill prächtiger, als vor wenig jaren beschechen, also und dergestalt, wa ainer hievor zechen fas wein gehabt, ann jetzo aber sich mit seinem gesinde mit 4 fas wein nit will beniegen laßen.
  3] Es wirdet auch fir gewis geschriben, daz der türgg vonn 2 provincien der tartaren (weliche dem moscowiter 3 jar laang zue dienen verpflicht) hilf gegen unnd wider den persier begert, die tartaren aber haben sich entschuldigt, das sie sich ohne bewilligung des moscowiters nicht unnderfangen dirffen, besorgende, da sie das gestatten, mechte der moscowiter (abwesendt irer) inn soliche lännder einfahll thuen.
Auf soliches hat der türgg ainen gesandten mit 40 personnen zue dem moscowiter abgeferttiget, weliche der moscowiter sambt seinen zuegeordneten gefänckhlich einziechen laßen, firgebende, soliche legation geschehe mehr aus übermueth unnd hoffart, er, der türgg wise, daß sein grosser herr der berüerten tartarischen lannden dem persier, mehr als ime hilf zuerzaigen, gewogen seie, darauf hatt der moscowiter alsbaldt ainen oratoren zum persier gesant, demselben anmelden laßen, der berüerten gefangnen türggen unnd wie er den tartaren nit gestatten welle, dem türggen zue diennen oder hilf zuerzaigen.
   4] Sonnst ist es bey hoff gar still, allain die saag noch fir gewiß, die römisch kaiserin werde im monath Mayo ir rais nach Spania nemmen.