Cod. 8955 - 423r-423v

Auß Wienn vom 9ten Septembris anno 1582
   1] Zu Erla sein vor wenig tagen zwo cette zu fueß außgezogen, deren die aine ein türggischen officialen, so mit einer stattlichen summa gelts auf Offen ziehen wöllen und mit zwayhundert janitschärn belaittet worden, die ander ein ansehenlichen chausen, die sie beede alßbalden umb ein guette summa geschätzt, angetroffen und aufgehabt, der official hat in einem waldt die janitschärn lassen vor anziehen, er seines gemachs gehn wellen, hirunder haben ine die unsern, ehe es die janitschärn gewahr worden, mit sambt dem gutschi und gelt hinweckh gebracht.
   2] Umb prorogation des fridlichen anstandts zwischen der Kay(serlichen) M(ajestä)t etc. und türggen hat albereit der orator zu Constantinopel bevelch zuhandlen, und hoffen wir, es solle guette ausrichtung volgen.
   3] Von etlichen ortten würdet geschriben, der könig von Poln sey beim groß türggen inn ein mißverstandt kummen, aber hierunder möchte woll etwas anders gesuecht und verstanden werden.
   4] Ertzherzog Maximilian ist diese tag widerumb hieher gelangt, der ertzherzog Mathias acht tag zuvor, und wie die vermuettung zuverstehn gibt, soll er general obristter in ober Hungarn werden, oder doch aufs wenigst ein raiß dahin fürnemmen, die gränitz zubesehen. Was daran, würdet die zeit mit sich bringen.
   5] Der obristte leütteampt zu Wesperin und Papa, Istwanffy Istwan und hussar Peter haben dise tag vor der vesten Wesperin mit dem türggen uber der F(ürs)t(lichen) D(urchlauch)t ertzherzog Ernsts verpott gekhempfft, der kampff aber ist dergestalt abgeloffen, das weder sie noch die türggen gesigt haben, allein ein kriegsman von Wesperin, Secey genandt, hat sein widersacher erlegt.
   6] Auf den 10ten oder 11ten diß sollen die F(ürs)t(liche) D(urchlauch)t ertzherzog Mathias wider von hinnen nach Lintz verraisen unnd aldortten iren hofstat vollendt in das werckh richten.