Cod. 8956 - 161r-162r

1] Den ersten Augusti anno 83 sein 2 curir von Constantinopel gen Wien khommen auß verordnete Khön(iglicher) May(estä)t orator unnd begern des Siaus Basa, zusehen, wo daz present so lang bleibt, seind 16. July außgeritten gewest, bringen ungeverlich, das Ferhat Bassa obrister in der persianischen expedition zu end Juny gen Artrum ankhommen, fruer alß man sich versehen, daselbst sein zu ime khommen und gewest die bechler auß Natulien, Alepo, Damasio, Cormanien, Maraß unnd Mesopotanie, willens mit im weiter gen Cars und Revan da selbst aine fesstung zupauen, denn der Ferhat hat aine grosse anzahl pauleut bei ime unnd der zeug, auch was […]  gehört zu Carß genugsam und baldt zu bringen versehen sich die türckhen, da nit böß witerung einfellt, wie dann sonst in selben landen frue und im Augusti schnee fellt, so wollten sy disen bau wider sultan gern sehe erheben, dann von der person furchten sy khaines hindern.
   2] Es sein wol etliche capitschi und zauschen gen Constant(inopel) khumen, habenn fürgebenn, die georgischen fürsten wollten sich mit dem Ferbat vergleichen, sich undter den sultan fannen begebenn, das glaubt man nit, der Siaus Basa selb nit, dann die persianer sein starckh, halten vest, sich dem türckhen mit tribut oder zudienen zuundtergebenn.
   3] Oßman Basa ist mit seinem höer im feldt zu Samachia, acht tagraiß von Demir Capi, habe ferten auch alda wöllen eine festung pauen, sei aber zum andern mahl abtriben worden und jetzt nemlicher zeit mehr von dem jungen persier geschlagen worden bei 10m person, darauf habe Oßman gen Constantinopel umb hilff geschribenn mit gellt grob geschütz umb schuech und tuech, dann sein volckh sei ubel entblöst, dagegen hat man im vil seines begern zugericht in die schiff thon mit 500 ganitschern gen Caffa verordnet, die werden fort zu ime Oßman Basa, und weil der tater hann mit ein 40.000 starckh personlich zu ime gezogen, acht manß on not sein, turckhen zu roß deßmahl zu im zu sendenn.
   4] Daß der persier mit seinem sohn sollt unainig sein, sagt die persische pottschafft und kauffleut, so zu Constantinopel jetzt seind, es sei nichts, die persern setzen starckh zusamen, sich wider der turckhen zwang zuerhallten, der jung persier  sei in Servan provintzen mit kriegsvolckh, ob auch ainicher fridt mit dem turckhen solt geschlossen werden, möchte man in einem gantzen jar nit zu ort khommen, jeder parthey das seine abzutretten und richtig zumachen.
   5] Hasan Basa gewester begler zu Cair hat sich mit den seinen darvon gemacht, ehe dann Ibraim Basa gen Cair khommen, grossen schatz von goldt und edelstain den 9. Juli gen Constantinopel bracht, ist zu landt herauß zogen, deß andern tags ist er gefengkhlich einzogen wordenn von dem Siaus Basa auf sultan bevelch, der Hasan ist in Asia bei Scutari gewest, den sultan da ansprechen wöllen, so hat man ime khain audientz geben.
   6] Die arabier sein noch zu feldt in aufruhr, weil es aber allein den begler sein person antrifft, der in denselben ländern tiranei hat triben, versicht man sich, die sachen werden widerumb gestillet, in guettema […..]  hat den Ibraim Basa gegläyt biß gen Alexandri und zurugg khommen in daz Welsche Meer seine hilff gespeist, damit in Affrica gelauffen.
   7] Der jetzig walachische weyda Peter Demeter, so sich lang zu Constantinopel bei der frantzosischen pottschafft aufgehallten, ist nit in großer gunst bei jederman, allein seines weib halben bleibt er was wenig, er soll gellt geben dem sultan, suecht bei juden unnd christen, richt wenig auß.
Scripta Vienne 6. Augusti anno 83