Cod. 8956 - 49r

Aus Wien vom 1. February anno 83
   1] Die zeittung der turggen niderlag halben vom persianer continuiren von allen ortten noch immer fort, also das die mehrers für gewisß zuhallten, alß darann zuzweifflen.
   2] Deß polnischen khönigs halbenn hat sy das geschräy auf Saggmar wider ettwas gestillt, unnd solle er jezo sein kriegsvolckh auf die tartern zuschickhen, nit waiß man, ob er damit ein einfahl in ir lanndt thuen oder allein sein dition retten wölle, etliche mainen, er hab sein gemuet unnd intent daher nit verendert, sonnder er wölle unnß nur damit sicher machen, damit er sein furhaben zu seiner gelegenheit desto besser gegen unnß vollenden möge.
   3] Dieser khönig hat nun zum andern mahl seine gesandte bei dem khönig auß Schweden gehabt, sich dessen, was er an Liefflanndt unndter den moscowittischen krieg eingenohmmen unnd noch in hannden hat, sonderlich der Narven zubegeben, aber der schwede hat seine gesandte mit hönischen abschlegigen beschaidt abferttigen lassen, also das zwuschen disen schwägern mehrer unrath unnd unwill alß freundtschafft zugewartten.
   4] Somit ists derzeit in Hungern allenthalben gottlob still.