Cod. 8957 - 145v-146r

Ferner zeittung aus Wien den 13. May anno 84
   1] Der gefangne beg von Kopan hat sich noch nit geschätzt, die Khay(serliche) May(estä)t haben den der F(ürstlichen) D(urchlauch)t ertzhörtzog Ernst geschenckht. Weil sich nit will schickhen, das Ir F(ürstliche) D(urchlauch)t dergleichen schatzungen sollen einnemen, haben sy ime den mitlern herrn von Harrach, Irer D(urchlauch)t obrister hoffmaister geschenckht nove autem tantum te, also das der beg anderst nit waiß, dann das er allem deß herrn von Harrach gefangner sei, er hat seinen gewesnen stallmeister hinein zum basa von Ofen unnd andern seinen guetten freundten wöllen schickhen, zuerkhundigen, was ime fur hilff von denselben möchte ervolgen, er sein schatzung auch zubenennen hette. So ist derselb stallmeister in der gefenckhnus zu Vesprim gestorben, jetzt werden ime 2 andere erlaubt, die er hinein muge ferttigen. Der basha von Ofen hat sein gesandten zu der Khay(serlichen) May(estä)t wöllen schickhen, die F(ürstliche) D(urchlauch)t ertzhörtzog Ernst aber hat im geantwort, das Ir May(estä)t weit von hinen, unnd dieselb nit wol anzutreffen weren, daruber ist er der baßa ettwas unwillig, aber man wirdt im jetzo wider zuverstehn geben, das er seinen gesandten biß hieher wölle schickhen, soll im das unversagt sein.
   2] Die Khay(serliche) May(estä)t hat den sultan bei dem nechsten curier, so umb den 20. Aprilis abgeritten, vertrösst, das sy zu end desselben monats die present hinein wöllen außferttigen, ich besorg, wir werden damit khaum zu ennd Juni aufkhummen, der gud von Eytzing wirdt dieweil desto mehr verehrung von den veziern dorten empfahen.
   3] Mit dem Niclas Palfi ist man jetzt alhie in handlung, ime den obristen bevelch zu Comorn zuubergeben, dan der Kielman jetzo kriegsrath unnd obrister zeugmaister ist.
   4] Graff Ferdinand von Nagrol verwallt den obristen bevelch in Oberhungern, unnd weil er sich mit deß mitlern herrn von Harrach tochter verehelicht, ist comunes opinionis, der werde denselben bevelch auch fort erhallten. Wien, 13. Majo 1584.