Cod. 8957 - 167r-167v

Auß Prag von 8. Juni
   1] Auß Polln haben wir zeyttung, wie daz man auf 12. Mayo inn aller frue den herren Samuel Zborofsski (wellicher den jetzigen pollnischen khönig zuer cron gebracht) zue Puokany uberfallen, unnd gegen Cracau gefengelich auf daz schloß gebracht, dahin ime nit allain seine verwandten, sondern auch die maiste ritterschafft aus dem crocawischen palatinatu gevolgt, welliche sich alda versamblet und umb sein erledigung hefftig angehalten, auch aus iren mitlen gegen Grodua zuem khönig abgesandt.
   2] Also ist mir seider zuegeschriben, daz er herr Zboroffsky den 26ten deß vergangnen monats gleich for der sonnen auffgang zue Cracau enthauptet, in ainem sarckh auf die baar heraus fur daz schloß gesetzt, und der versamblung herunder angemeldet worden, daz sye ine for dem thor finden werden, wie nun menigelich geloffen und den sarckh aufthuen wöllen, haben die schitzen auf der maur geschryen, sy soltens nit thuen, bis seine freundt und diener zuer stell khemen, und wie dieselben khomen, haben sy die leicht in der baar inn ain roth tuch (darauf er gerichtet worden) eingelegt gefunden und den kopf am halß wider angehefftet, uber die baar war ain schwartz tuch aufgebraittet, mit was heulen und geschray sy die baar aufgehabt und hinunder in ain haus getragen ist nit wol zueschreiben, hierauf samblen sich die Polln ohne underlas und sicht ainem grossen thumult und empörung gleich.
   3] Der khönig hat von Grodua alberaidt etlich heuduckhen dem cantzler zuer hilf zuegeschickht, die seindt auskhundtschafft, denen wartten die poln for und willens niderzuehauen.
   4] Der khönig ist (wie obgemelt) zue Grodua, dahin war neben seinen abgesandten ain türggischer chiaur ankomen, es ist auch gwis, daz die türggen starckh inn der Walachey seindt ankhomen.
   5] Der landtag im landtag Steyer ist abermals ohne frucht abgangen, und will die landtschafft Irer Durch(lauch)t khainen gehorsam mitnichten nit laisten, dieweil sye bei irer althergebrachten gerechtigkhait nit pleiben khönden, fordern all ir khriegsvolckh, so sy Irer Durch(lauch)t an den grenitzen auf iren costen gehalten, ab, daz gefällt dem turggen wol, der sterckht sich umb dieselb gegendt, zuebesorgen, werde bald ainen einfall thuen.