Cod. 8957 - 184r-189v

1] Nach ankhonnfft des curiers von Constant(inopel), der die zeitung der tartarischn victori bracht, khombt noch mer bericht, daz die türggen im Appril und May mit hechstem verlanngen des zauschn, so in Polln verschickht und seiner verrichtung gewartt, sonderlich aber zuwissen begert, ob das geschüz, so von Bender weckh gefüert worden, sambt sovil tausent seelen von könig in Poln sein erbieten nach restituiert sey, im mitls sein uber die vorigen noch andere zwo galleen mit etlich vill stuckh geschüz, monition unnd 600 janitschären auf Bender und annderen örtten daselbst herumb an die reüsseschn gränizn verschickht, und ist ir mehr lautmär und offenbar worden, was der Osman basa für merckhlichen schaden von den reißen und cirassen am durchraissen gelitten habe, gleichs fals auch, das er zu Demircapy, alda er lannge zeit glegen, uber vill tausent man, so er daselbst verlohrn, und ain ansehenliche suma gellts,  so er daselbst spendiert, mehrers nichts als das ainiche castel Sumahia und Derbendt erbaut, unnd bißhero, weil vill volckhs daselbst gelegen, erhalten habe.
   2] Osman basa hat sich hechlich bemiehet, dem tartar han mit dem sultano zuversöhnen und ine mit sein volckh nach Demircapy zubewegen, tartar han aber ist bey seinen vorigen mainung allerdings verbliben, nemlich da sulton seine des tartar han drey gebrüeder, sonnderlich aber den eltisten, so zuvor zu Jamboli gewondt und damals zu Cuthaia in Asia residiert, vor dem er sich am maissten besorgt, frey und loß seinem zuesagen nach uberanntwordten wirt, so sy er erbittig, entweder in der person oder aber durch seinen eltisten sohn dem sultano mit gantzer macht bey zustehen, sultonus hat aber die jhenigen, so er in seinen schutz und schürm angenomen, an verlegung seiner hohait ime tartar han nit ervolgen lassen könen, dahero er soltonus durch alle anndere gelegenheit und mitl sich bemiehet, ime tartar han in annder weeg zu contentiern und von aller sorg gemelter seiner brüeder zuversychern, under annderm haben sich auch der muffei unnd die cadilesesier sambt dem Chiaus bassa under dem schein der religion understannden, ime den tartar han zu gemeltem zug gehen Demircapy zubewegen, waz sy aber bei ime außgericht, hat man bald hernach gesechen.
   3] Nichts weniger sein damals zu ennt Apprilis von tag zu tag kriegsordnungen nach Persia hechstes fleiß gefürdert und fordt geschickht, die geörgianer zu uberfaln und ain annder vestung in der provinz Naxuan, drei tagrais von Revon, zupauen.
   4] Den 15. Apprilis ist bey nachts in aller eil ain galeotten von Caffa durch den Osman bassa abgeferttigt geen Constant(inopel) khomen mit bericht, daz, nachdem er Osman bassa auß bevelch des sultony des tartar han brueder ainen, Islan Güray han vor ime am maisten gefirchtet, und der in gehaim von Cuthaia auf Sinope von dann hernach auf ainer galeotten nach Cafa gefiert worden, zu einem regierendten kiren und zu ainem tartarischen fürsten einzusezen und zu publiciern für die handt genomen, sey er ime Islan Güran han gleich woll etliche tartarische lanndt leüth und thails der brueder tartar han kriegsvolckh bey und zuegefalln, darauf und als nun der tartar han der türggen fürnemen und worauf sy lannge zeit mit listen und practiciern und jetzo letztlich a parte umbganngen, habe er in die 40.000 man zusam bracht unnd sich auf 2 meil wegs umb Caffa gelegert, auch das lanndt umb und umb verödt, vorhabens sich umb gemelte statt anzunemen. Daher aber er, Osman bassa, aufs aller eheist hilff und sonnderlich ain etlich tausent schüzen sambt etlich stuckhen geschüz begert, darauf die vezier bassan und fürnembisten offizier, als aus bevelch sultoni privatim in des Siaus bassa hauß zusamen khomen, und nach lannger beratschlagung dem Uluzali ernstlichen auferlegt, sich innerhalb acht oder zehn tagen mit ain 30 galleen ferttig zumachen und allen denjenigen, so besoldung von arsonal haben oder auf die galleen gehörn, sich innerhalb drey tagen gleichfals ferttig zumachen, bei leibstraff bevelchen lassen, der Siaus bassa ist selbst mit dem Uluzali in das arsonal gefahren und die aufrüsstung gemelter galeen dermaßen angeordnet, und weil an irem glückh die 2 mahonen, mit geschüz und munition geladen, auch in di 4000 janitschären sambt annderem kriegsvolckh, so man nach Demircapy verschickhen sollen, auß mangels des wündts noch verbleiben, hat Uluzali solch muhonen und kriegsvolckh mit sich auf Caffa genumen.
   5] Also sein den 16. Apprilis etliche curier von Ferhat bassa vezier gen Constant(inopel) khomen, bey denen er den sultonum berichtet, da er sultonus selbst personlich nit fordtzaigt, oder aber der janntschör aga sambt allen seinen undergebnen alle ordinirt der spahion und daneben merer verordnung an provant und annder kriegs notwendigkaiten nichts anschafft, wisse unnd khüne er kainswegs dem sultono was fruchtbarlichs zuesagen, vil weniger seinen des sulton willen zuvolziehen.
   6] Die ursachen des widerwillens sultoni gegen dem tartar han sein underschidlich dorten erzelt worden, für ains wellen ir etlich, das sultan, als er wider den tartar han darumben, daz er auf sein offers zuesagen und darauf empfanngne sovil hundert tausent ducaten nicht in Persia gezogen, unnd mit hechstem unwillen erzüernet, fürneblichen deßwegen dem Osman bassa von Demircapy dahin geen Caffa ime tartar han umb daz leben zuebringen abgefordert habe, als er, Osman bassa, aber von 12 in die 15.000 man, so er mit sich von Demircapy genomen und mit dem er sein des sultoni willen ohne sonndere difficultet ins werckh zurichten vermaint, die 2 tail underwegs verloren und kaum mit ain 3 oder 4 tausent armer abgezerter man daselbst zu Caffa ankhomen und die ainbevolchne inprossa sovil müglich mit lüsst und betrug er praticiert, soll gemelter tartar han aller sachen erindert und von den fürnembsten des Osman bassa leüdten vermanet sein worden, sich vor ime Osman bassa woll für zusechen und ime nit allzuvil zuverthrauen, darauf er sich alßbaldt auf ain etlich tagraisen von seiner gewendlichen residenz retiriert und daselbst sein volckh doch under disem schein an seiner suma dem sulton zugefallen in Perssian zuschickhen zusamen gebracht und doch nihemals auf öffters des Osman bassa begern sich bey ime Osman bassa personlich finden wellen, darauf er Osman judiciert das ungedachter tarter han seines fürnemens gewahrnet, und mit lüssten nun mehr zuvervorttailn, hat also bald ainer des tartar han brueder, Hale Geray han genannt, den er lannge jar bey sich gehabt, in namen und biß auf weiteren beschaid des sultoni fuer ain verwallter und regennten des fürstenthumbs oder königreich Tartarey publiciert, zu welchem alsbaldt aines thails hofleuth der türggischen portten zuegethon, und etlich lanndt und bevelchs sambt iren undergebnen gefallen, und mit hilff der jhenigen, so Osman bassa ime zugeben, den bruedern ain schlacht gelifert, von dem er nachet aufs haubt erlegt, sein volckh verloren und sich selbst mit hörter mhüe geen Caffa zum Osman bassa salviert, und weil die pratica also mißlungen und der tartar han nach gehabter victori wider den brueder alle umbligende ortter umb Caffa abgeprenndt und sich nachet auf 2 meil weegs von Caffa gelegert, hat er Osman bassa die hülff, davor oben meldung gethan, begert.
   7] Anndere sein der mainung, sultonus habe lenngst zuvor aus sonderlicher neigung unnd auf anhalten viler ansehenlichen tartarn dem obgemelten des tartar han brueder Islan Geray han, welcher er, sulton, lanng jar zu Jamboli und jezo zu Cuthaia in Anatolia statlichen underhalten, ime fürgenomen, gedachten Islam han als ain beglerbegen in die Tartarei einsezen und dasselbige lanndt dardurch allerdings an sich zuziehen, weil aber diese jar herumb und sonderlich bey werenden persischem krieg nie guet gelegenhait, solche sein fürnemen mit fueg und one thumullt ins werckh zurichten, habe er darumb so offt und embsig angehalten, ime tartar han in aigner persohn wider Persia zuvermögen, damit er daselbst von Ossman bassa umb das leben gebracht, und ernennter Islan han, so bey den lanndtleüthen grossen gunst hete, ins lanndt eingesezt werden mechte, diß sol nun der tartar han lengst wahrgenummen und derowegen nihemals aus dem lanndt personlich ziechen wellen, welches den sultonuen nicht wenig in gehaimb verdrossen, welcher bey obangedeüter gelegenhait daz mergedachter tartar han auf sovil empfanngne ducaten unnd auf sein offen beschechens zusagen nicht fort zogen, sich genzlichen entschlossen, ime umb lanndt unnd leüdt, auch womiglich gar umb das leben zubringen, auch solches wie vorgemelt durch lüsst und mitl des Ossman bassa, doch mit schlechter freyden, versuecht, derwegen er sich lezlich bedacht, mit gewallt sein obberürtes fürnemen ins werckh zurichten, hat derwegen den 25. Apprilis 4000 janitschärn, di spachin silichtar genannt, so in die 2000 sein mechten, 300 giebetschi oder zeugwarth, sambt ainer grossen anzall allerlei rüsstung, 300 tarpschi oder pixenmaister, alle die azapen, so in 3000 schüzen sein mechten, auf ain 20 gallern imbarchieren lassen, mit welchem und noch 10 anndere der capitan bassa sambt alle seinen undergebnen bald hernach gegen Caffa abgeschifft, in mitels sein etlich czauschen geen Cuthaia gezogen, mer ernennt Islan han geen Constant(inopel) zubringen.
   8] Nicht weniger sein von Constant(inopel) auß teglichem volckh, geschüz, große anzall allerlei rüsstung, sonnderlich aber vil tausent haggen nach Arzrum dem Ferhart bassa vezier zuegeschickht, wiewol etlich daneben der mainung gewesen, da der tartarische hanndl sobald nit gestilt werde, das der Ferhart bassa diß jars nichts sonnderlichs fürnemen, sonnder sich allain zu der defension notwendig versichern hete sollen, und dises darumben auch, weil derselben ennden und nachent durch ganz Syriam, Mesopotamien, Asiam, Armeniam, daher er Ferhart bassa die maisste hilf und proviannt zu gewartten, uber die maßen grosse teurung und sterben sein soll. 
   9] Damals ist auch gehaime zeitung khomen, daz der könig in Bersia sich allerdings mit seinem nachpern dem usbeck han, den er zuvor in ainer schlacht uberwunden und gefanngen, verglichen und vereiniget und zur dessto krefftiger bestettigung irer freundtschafft und verpündnuß ernennts usbeck han tochter mit seinem eltisten, Ismahil genannt, verheyrat, welchem er könig in Persia, auch weil er nun mehr alters halben zum krieg untauglich, daz regiment ubergeben und verschafft haben soll.
   10] Dem Giaffer bassa, so zu Filistria gelegen, und Alli beglerbeg Graciae ist zum anndern mal ernstlich bevolchen worden, one verzug nach Pender und Acharnan mit iren zuegebnen sich zueverfügen, gleichfals dem waiwoden auß Walachei und Moldau bei leibstraff auferlegt worden, den zwayen Giaffer bassa und beglerbeg Greciae mit volckh, rosß, proviannt und anndern notdurfften zuezuspringen.
   11] Den 26. Apprilis ungevarlich umb vesperzeit sein die zwen gedachts tartar han gebrueder Islan Giray han der eltiste, ain mann bey seinen 40 jaren beileiffig, unnd Dervis Gerey han, noch ain junger gesell von ain 20 in die 25 jaren, von Cuthaia biß geen Nicomodia zu lanndt und von dannen auf zwo gallern geen Constant(inopel) bracht, von dem Siaus bassa und nachent allen andern sultanischen officiern in des sultani lustgartten under dem sereglio, alda si abgesannten empfangen, und biß in daz losament nit weit von gemelts Siaus bassa behausung belaitet worden, und hat er Siaus bassa daz abentmal bei gemeltem brueder angenommen und nachmals nachent die ganze nacht uber bei dem eltisten allein rotirato zugebracht, des anndern tags hernach an ain freittag hat inen sultonus ansehenliche verehrungen von gulden stuckhen und anndern claidern, insonderhait aber dem eltisten ain sabl so sambt der schaidn durchaus mit edelgestain versetzt und ain wolgebutztes schenes roß sambt ain pusch, gleichfals mit edelgestain versetzt (so alles auf etlich vil tausent ducaten geschätzt worden) durch seinen capitschi […]  chihaia so hernach mit inen auch nach Caffa dem eltisten als ain beglerbeg wie sonst mit Moldau und Walachey gebreichig, in daz lanndt einzusezen geraist, verehrn laßen, und gleich desselben tags nach verrichten irem gebett sein mergemelte gebrueder aus irem losament in daz sultoni alts seraglio, alda er jetziger zeit wohnt, von allen officiern, alda si ain stundt ain etlich aneinander den eltist bey dem sultano allein und der annder bei dem vezier bassa sich aufgehalten, hernach aber nach empfanngnen fanen von lermeßyn [?] taffat und etlich gulden buechstaben, wie mans den beglerbegen zugeben pflegt und genommen, abschid solemniter unnd mit großem pomp und freyden  biß zum wasser, alda ain 20 wolgerisster galeen aud sy gewarttet, belaittet worden, und desselben tags noch zu abent mit dem Uluzali selbst biß zu des Barbarossa moschaa, alda si denselben abent von ime dem Uluzali brechtlich panckhatiert, und dann umb mitnacht weiter gefahrn. Als aber der windt inen zuwider und je lenger je mehr contrario gewesen, haben si iren weg von Constant(inopel) in Asia genomen und ain etlich tag daselbst stilligen miessen, und obwoll angereggter triumpff von den türckhen auf das aller brachtlichist mit großem frolockhen und freyden verner wart an allen ortten nicht annderst, als wann sy berait ain groß künigreich und lanndt eingenomen hetten, angestellt, so hat man doch bei obgemelten zwaien gebrüedern und sonderlich bei dem eltistn mer traurn und clainmietigkhait als frieden gespürt, und solle der eltest Islan han, als man ime zeitung bracht und ine gen Constant(inopel) hart erschrockhen sein und doch merers nicht gesagt haben, dann sovil des sultoni will und bevelch gescheche, wies aber mir und anndern entzwischen geen wirt, khöne ain jeder verstendiger erachten, Gott were aber allmechtig und ainem jeden sein glickh und unglickh noch in muetter leib an die styrn geschriben, und hiemit hat er sich aufgemacht und ist geen Constant(inopel) khomen.
   12] Nach verraißn aber gemelter gebrueder und des capitani seind underschidliche curier zu lanndt und ain galeotten zu wasser geen Constant(inopel) khomen, bei welchem Osman bassa nachmals eillents hilff begert, unnd hat damals der alte tartar han nicht allain die vorstätt umb Caffa ab und außgebrendt, sondern auch die statt unaufhörlich von ainem perg, so die statt uberhechet, mit 36 groß und clainen stuckhen geschütz beschossen, und dem Osman bassa daneben dermaßen geengstigt und ime die hilff zu wasser nit bald zuekhomen, daz er sich in die leng nit aufhalten hete können, so hat auch er tartar han mit hilff der reüßen, circassen, und wie etlich sagen wellen, den kosackhen auch an merern ortten underschidlich und sonderlich gegen Bender und der Moldau dem türggen, so ime ins lanndt fallen mechten, damit zubegegnen, etlich tausent mann zu veldt bestelt, und als solches der vezier Giaffer bassa, so disen winter zu Silistria gelegen und jetzo nach Dobriza gegen Bender doch mit wenig volckh gezogen, geen Constant(inopel) berichtet, und mer volckh von Constant(inopel) auß oder sonst begertt, hat ime sultanus darauf wider dieser porten altem gebrauch bevelch zuegeschickht, aller ortten, da er sich befindt, gemaines volckhs zubeschreiben unnd ain etlich tausent man zu roß und fueß, wie ers bekhomen khan, umb besoldung aufzunemen, also sein auch dem beglerbeg Gracia scharffe bevelch zuegeschickht worden, mit obgedachten Giaffer bassa sich zu comuniciren, zu Constant(inopel) aber sein in grosser eyll bei tag und nacht noch 8 galeen und 2 fahenen, auch etlich portocanali, darauf noch ain tausent janitscharn zu den vorigen 3000, drey masul beglerbeg sambt irn leüthen, etlich hundert pferdt, allerlei munition und sonderlich vil stuekh geschütz geladen und den 4. May, wiewol mit schlechtem windt, vort geschickht worden, a nder 10 galeen haben auch inerhalb wenig tagen sambt 2 mohonen ferttig sein sollen, daz kriegß volckh zu fueß, darunter 2000 janitschärn, allerlei notdurfften mehr, sonderlich aber in die 200 clain stuckh auf rädern, so dem Ferhart bassa vezier zueverordnet, von hinen nach Trapezont zufiern.
   13] So haben auch den 8. May drey jacabosophi oder rotmaister dem sultoni den rockh gekhusst und irn abschid genomen, sambt 1000 janitschärn zu lanndt von Constant(inopel) nach Arzrum zuverraißen, und weil man an janitschärn grossen mangl hat, sollen anstatt der 3000 janitschärn, so geen Babilon vor dieser zeit verschafft gewest, zwen beglerbegn, der von Maraş und Sebastia,  mit irem volckh dorthin geordnet werden, die ubrigen beglerbegn aber, so in Asia sind, als zu Alepo, Damasco, Caremit und aus Natolia, Mesopotonia sollen gleichfals bevelch haben, zu enndte des negstkhunfftigen Juni aufs lengist zu Arzrum beim Ferhat passa vezier sich zubefinden.
   14] Dann vor 3 tagen ain fürnemer persianer, so von Termackh  sulton abgewichen und zum Ferhart passa vezier mit schreiben khomen sein soll, von ime Ferhart passa mit schreiben, auch von dem beglerbeg von Van und vom Zigal Ogli, jetziger zeit vezier und beglorbeg zu Revan, geen Constant(inopel) geschickht, und sovil man so woll aus gemelt beglerbegn schreiben als auch sein des persianers mündlich anzaigen verstannden, solt der könig in Persia in die 40m man, denen er seinen sohn zum obristen gemacht, beisamen haben, vorhabens, disen somer sein gelickh mit dem türggen, wovern sy sich annderst in freyem veldt finden lassen, zuversuchen, darzue dann die tartarischen rumores nicht wenig geholffen haben. Waz es aber für ein enndt genomen und was hernach aus Perßia khomen, daz ist durch den nechsten churier, so den 24. May zu Constant(inopel) ausgeriten, bracht, und hievor verzaichnet und uberschickht worden.
Wien den 27. Juny 84.