Cod. 8957 - 293r-293v

Aus Prag von 21. September
   1] Die vergangne tage ist ain spanischer ehrnholdt mit 4 gülden flüßen hieher khommen, der Kay(serlichen) Mai(estät) etc., erzhertzogen Caralo und Ernsten, deßgleichen herzog Wilhalmen in Bayrn von wegen der Khön(iglichen) Mai(estä)t etc. von Hispannia zue prasentieren, deren fürssten ist man alhero gewärttig, solche güldene flüß personlich zuentpfahen, desgleichen soll auch mons(ieur) Assomuille obrister canzler den gülden flüß aus den Niderlanden täglich hiehers khommen, sulliche gülden flüß mit beharlicher sollemnitet von seines herren und khönigs wegen zue uberlieffern.
   2] So gehet alhie auch die saag inn gemein, beyde churfürsten von Sachsen und Brandenburg sollen inn ainer balde auch hieher khommen, unnd demnach der gefangne fürst zue Sachsen inn der Neustadt sein zeit der aufgelegten straff längst außgestanden, also daß ire fürsstliche gnaden hette lädig werden mögen, unnd aber Augustus, churfürst zue Sachsen bei der Kay(serlichen) May(estä)t etc. sovil erlangt, hochgedachten fürsten nicht außlaßen wöllen, es erclärt sich dan ire Churf(ürstliche) Gnaden selbst auch daruber, auch solche erclärung (uber vielfältigs und embsiges anhalten) bälder nicht ervolgen wollen, als jüngst, da Ire Churb Fürstl(ichen) Gnaden im warmen badt bey Franckhfurdt gewesen, sich der gefenglichen entlassung declariert, also sol der lang gefangen gehaltene und jezo erlädigte fürsst von der neustadt ausgelaßen werden und samtäglich hieher khommen.