Cod. 8957 - 338r-338v

Auß Prag von 13. November
   1] Von deß gefangnen fürsten zue Sachsen erledigung ist wider still worden.
Stirbt an yezo sehr in der Neustatt, also daz wol 12 heuser alda gespört, und will die infection zue Wien auch nit gar nach laßen.
   2] Der fürsten alhero zuesammenkhunfft wegen der guldin vellus werdet ir vernommen haben, daz es zue rugg gangen unnd daz erzherzog Ferdinandt und erzherzog Carol underweegs gewest, und als Ire D(urchlauch)t vom herren Khoßnan Gienger, viztum zue Linz, durch zwen eylbotten entgegen bericht, daz es der orthen, da Ir Für(stliche) D(urchlauch)t zue raysen wellen, der infection gar unsicher sein sollen, haben sich beede erzherzoge widerumb gewendt, deßen die Röm(isch) Kay(serliche) Ma(jestä)t gar ubel zuefriden, daz der herr viztum solches auß inen selbs und ungefragt gethan, so es sich doch hernacher alles nichts befunden, hat also aller uncosten, wie herlich und stattlich alle sachen angestelt geweßt, vergeblich sein mießen, wirdet also diß jar nichts mehr daraus werden.
   3] Unnd weil erzherzog Ernst und Maximilianus schon alberaith so weit khomen gewest, Iren D(urchlauch)t(en) aber ain currier entgegen gesant und denselben von der Kay(serlichen) Ma(jestä)t haimb gesetzt worden, ob Ire D(urchlauch)t(en) follent hieher wellen, habe sich also nichts anders bedacht, dann daz sie mit 6 kleppern her posta auf 6. diß nach mittags alhie ankhommen, darauf alßbaldt ain aigner currier zue der Für(stlichen) D(urchlauch)t erzherzog Ferdinando zue Insprugg gejagt worden umb anstellung aines andern tags von wegen der empfachung der guldin vellus, wiewol man sonsten auch in gehaim sagen will, es seye von wegen des governator ampts zu Maylandt für erzherzog Maximilian, und bleiben also baide erzherzog alhie, biß bemelter currier widerumb khumbt, dessen man innerhalb 4 tagen gewertig, inn mittels werden alle kurzweillen getriben.
   4] So ligt auch der monsor Assomuille, oberster schazmaister der berierte guldin vellus mit an 30 personen und etlich pferd auf der Kay(serlichen) Ma(jestä)t uncosten alhie, wartet ferners beschaidt, wie ubel aber höchstgedachte Kay(serliche) Ma(jestä)t mit dem vizethumb zue Linz zuefriden, daz er an allem an dem schuldig, würdet er am bösten durch ain schreiben von Irer May(estät) erfahren haben, und wellen etliche sagen, er seye seines ampts entsezt.
   5] Sonst haben wir von zwayen tagen zeitung von den windischen grenizen gehabt, wie daz die türggen in 10.000 starckh gar biß an Labach gestraifft, vill dörffer verprant und ain groß raub zuewegen gebracht, auch biß in 500 christen mans und weibs personen auch khinder mit inen hinweckh gefiert, entzwischen haben sich die unsern aufgemacht, den türggen nach gesezt, dieselben angriffen, geschlagen, und biß aufs haubt auch uber die 8000 türggen nider gelegt, darunder 8 fürnemme weckh, und den raub sambt den gefangnen christen widerumb erobert, also der türggen gar wenig darvon khommen.