Cod. 8959 - 290r

Aus Cölln von 30. jenner
Das spannisch volckh, so sich gegen der statt Neus vor ettlichen tagen erzaigt hatt, ist widerumb zue rugg. Die grosse hungersnott verhindert vil und wirdet noch mer einreissen. All die weill das land nit kann gebawet werden, dann die bauren lauffen noch täglich darvon, was nitt todt geschlagen will werden. Gott der herr verleiche, das zue Wormbs vil gutz verricht werde, zur abhelffung unnsers jämerlichen kriegs.
Unnser neuer bischoff ist aus Brabandt vom printzen von Parma widerumb zu Bonn ankomen.
Die von Neus haben gestern ain faren schüff, darinnen vil englische tuch, butter und käs gewest, genommen, welliches sy von der anndern seitten des Rheins herumb gefiert. Denen hat man zu wasser und lanndt also baldt nach geeilt. Was darauf erfolgt wirdet sein, hat man stundtlich zuvernemben.
Dieweill dann jeziger churfürst auch bischoff zu Münster ist, wellen sy alles, was daher kombt für feindes güetter halten, unangesehen wem sy zusteen.